Ramirez, Napalla nag-una sa Christmas Run
CEBU, Philippines – Ang beteranang runner nga si Mereeis Ramirez ug di kaayo iladong si Christopher Napalla ang midominar sa tagsa-tagsa nila ka mga dibisyon sa Christmas Run sa JCI-Cebu Mactan Channel Incorporation’s Christmas Run kagahapon didto sa Ayala Center Cebu grounds.
Gibiyaan ni Ramirez ang iyang mga kaatbang human siya mitapos sa 12K sud sa 56 minutos ug 51 segundos. Gisundan siya ni Mea Gahi nga mirehistro og oras nga 1:07:38, samtang ang third placer mao si Rona Lacanlalo sa oras nga 1:11:00.
Sa pikas bahin, si Napalla maoy unang milabang sa finish line sa 12K mens sa oras nga 47:58. Ikaduhang dapit si Paul Delposo nga adunay oras nga 50:40, samtang si Russel Romulo mitungtong sa ikatulo sa oras nga 54:07.
Si Yssa Briagola ug Jerson Casinillo ang midaog sa titulo sa 6K.
Si Briagola adunay oras nga 32:40, labaw lang og duha ka segundos batok sa second placer nga si Megan Arneson, samtang ikatulo si Madelyn Bedolido (39:43).
Uban ni Casinillo (25:07) sa top three finishers sa 6K men’s class sila si Adelio Chang (27:48) ug Randell Siray (29:10).
Migawas usab nga mga mananaug sa 3K fun run sila si Ralph So (11:17) ug Nicole Del Rosario (13:48). (BANAT NEWS)
- Latest
