USP-F Panthers daog batok UTM-Malaysia sa overtime

CEBU, Philippines – Nakatangag na sab og dakong bihag ang University of Southern Philippines Foundation Panthers human sa ilang 91-86 nga kadaogan batok sa mas tag-as nga Universiti Technologi Mara (UTM) gikan sa Malaysia pinaagi sa overtime kagahapon sa 1st Asian Pacific university Games (APUG) basketball tournament didto sa USC gym.

Sa main game, wala gihapo'y pilde ang Nippon Sports Science University (NSSU) Lions gikan sa Japan human sila makaipsot batok sa newly-crowned Cebu Schools Athletic Foundation, Inc. (CESAFI) champion University of San Carlos Warriors, 73-70 alang sa ilang ikatulong sagunson nga daog nga nagbutang kanila sa maayong posisyon nga mahimong kampyon sa maong torneyo.

Hinoon, moduwa pa sila batok sa Malaysia karong hapon sa usa ka non-bearing game diin maoy ilang tuyo nga mokulit og 4-0 sweep.

Ang rookie sa Panthers nga si Ayn Obenza miburak og 32 puntos aron pangulohan ang ilang ikaduhang kadaogan samtang midugang og 13 ug 12 puntos matag usa silang Lyndon Colina ug Carl Langahin alang sa 2-1 nga Panthers.

Ang UTM kinsa wala gihapo'y daog sulod sa tulo ka duwa, gipangulohan ni Mohd Ali kinsa misakmit og 21 puntos samtang miamot og 17 puntos si Patrick Heintzman ug may 15 puntos si Mohd Firdans Karamudin.

Sa laing bahin, migamit lang gihapon sa ilang maayong 'ball movement" ang Lions ug nag-igo lang gihapon sila sa ilang mga three-point attempts aron pabiling walay mantsa sulod sa tulo ka duwa.

Si Sekido Yusuke maoy nangu sa Lions sa iyang 18 puntos samtang miamot og 14 puntos si Oshiro Yusaku. Ang ikatulong nakahimo'g dakong score sa Lions mao si Kato Kei sa iyang nuybe puntos.

Misuway unta pagsakmit sa liderato ang Warriors sa kataposang 2:32 sa fourth period apan nabuhian ni Ian Tagapan ang bola dihang mosuway na unta siya og lay-up ug biya lang sila'g usa ka lugas, 60-61 human sa split charities ni Nico Magat.

Ang maong turnover nagbayad og laing three-pointer gikan ni Yusuke aron inaton ang labaw ngadto sa tres puntos, 64-61.

Misikit lang gihapon pag-usab ang Warriors, 68-69 human sa talagsaon nga four-point play ni Tagapan   sa foul ni Taguchi Wataru sa kataposang minuto ug miskit pa gyud sila sa kataposang higayon, 70-71 may  24 segundos ang nahibiling oras apan ang duha ka free throws sa Lions maoy nagselyado sa ilang kadaogan. (BANAT NEWS)