Curry naka-40 PTS

CEBU, Philippines - Miiskor na sab og 40 puntos si reigning MVP  Stephen Curry alang sa Golden State Warriors nga mipilde sa Charlotte Hornets,116-99 sa nagpadayong aksiyon sa National Basketball Association kagahapon didto sa Time Warner Cable Arena sa Charlotte, North Carolina.

Sa maong kadaugan, nainat sa Warriors ang ilang best start sa kasaysayan sa NBA ngadto sa 20-0.

Niadto sab nga gabhiona, gipasidunggan sa Hornets ang amahan ni Curry nga si Dell, kinsa maoy scoring leader sa Hornets, apan ang iyang kamaguwangang anak maoy miilog sa eksena nga mipasud og 14 of 18 shots gikan sa field ug mihimo’g 8 for 11 gikan sa 3-point range.

Si Stephen Curry  nga didto magdaku sa Charlotte ug maoy star sa Davidson College, miburak og 28 puntos didto sa third quarter ug maoy miiskor sa katapusang 24 puntos sa iyang team diin nakahimo siya’g 10 of 11 shots  gikan sa field, lakip ang lima ka triples.

Gipalingkod  na si Curry sa kinatibuk-ang fourth quarter tungod kay daku na kaayo ang ilang labaw ug wala na siya mahatagi’g higayon nga buakon ang iyang career high nga 54 puntos.

Si Nicolas Batum maoy nangu sa Charlotte sa iyang 17 puntos uban sa walo ka rebounds.

Si Klay Thompson adunay 15 sa iyang 21 puntos sa first period diin ang Warriors sayong miposte og 15 puntos nga labaw.

Sa laing duwa, si  Kobe Bryant mihimo og season-high 31 puntos    aron pangulohan ang Los Angeles Lakers ngadto sa 108-104 nga kadaugan batok sa Wizards didto sa Verizon Center sa Washington D.C.

Si John Wall, kinsa miposa’g 34 puntos uban ang 11 ka assists maoy nangu sa napildeng Wizards. (BANAT PALARO)