Megabond, Dorma nanghawod sa eliminasyon
CEBU, Philippines - Gilabhan sa Dorma ang CMI, 79-55, aron pagsignit sa ikaduhang puwesto sa Architects+Engineers Basketball Association’s 1st Corporate Cup niadtong Sabado didto sa University of San Carlos-Main gym.
Si Ed Macasling miratsada og 36 puntos uban ang lima ka assists, upat ka rebounds ug duha ka steals sa Dorma, nga mipabarag nang daan sa CMI human sila milabaw og 16 puntos sa halftime, 34-18.
Nakasustinir ang Dorma sa ilang kainit dayon na ngadto sa paglubong sa ilang kontra og 24 puntos.
Gumikan niini, ang Dorma makaangkon og ‘twice-to-beat’ incentive batok sa CMI nga ilang makasangka pag-usab sa crossover semifinals, ingon man ang topseed Megabond batok sa fourth-ranked Fenestram. Ang mga mananaog maoy mag-abot sa best-of-three finals.
Sa laing bahin, ang Phoenix milubong sa Davies Paints, 89-60 alang sa bugtong niining daog sa 10 ka duwa.
Ang Megabond maoy midominar sa double round elimination bitbit ang 9-1 win-loss record ug gisundan kini sa Dorma (7-3), CMI (6-4), Fenestram (5-5) ug Davies Paints (2-8). (BANAT NEWS)
- Latest
