Melindo dunay bag-ong kontra sa Pinoy Pride 34
CEBU, Philippines – Si ALA Boxing Gym star Milan ‘El Metodico’ Melindo makigsangka og bag-ong kontra nga si Victor Emmanuel Olivo sa “Pinoy Pride 34: Back with a Vengeance” karong Sabado didto sa Hoops Dome sa Barangay Gun-ob, dakbayan sa Lapu-Lapu.
Si Melindo gikatakda unta nga makigsangka batok ni Carlos ‘Divino’ Fontes alang sa WBO International light flyweight belt, apan ang Mehikanong boksidor dili makaaway gumikan kay gi-dengue kini.
Gumikan niini, ang away ni Melindo ug ni Olivo gipaubsan ngadto sa usa ka 10-round, non-title bout ug undercard na lang sa maong eksplosibong promosyon diin si ‘King’ Arthur Villanueva (27-1, 14KOs) mao na’y mosalida sa main event ug iyang harungon si Victor ‘Spock’ Mendez (19-2-2, 15KOs) alang sa WBC International super flyweight title.
Angayan gihapon nga saksihan ang bag-ong tahas ni Melindo (32-2, 12KOs) gumikan kay iyang hagiton ang 19-anyos nga si Olivo, kinsa wala pa’y pilde sa siyam ka away diin upat sa mga biktima niini iyang gipakatog.
Sila si Melindo ug Villanueva pulos naglungot-lungot nga makabawi human mapakyas sa ilang tinguha nga ma-world champion sa miagi nilang mga away.
Ang 27-anyos nga si Melindo napukan pinaagi sa kuwestiyonable nga sixth round technical decision batok ni Javier Mendoza sa ilang IBF light flyweight title bout niadtong Mayo 30 didto sa Campo Nuevo Ensenada sa Baja California, Mexico.
Susama sab ang nasinati ni Villanueva, nga mura’g maoy dumadaog batok ni McJoe Arroyo sa Puerto Rico apan sa kinauwahian napilde kini pinaagi sa kontrobersiyal nga 10th round technical decision sa ilang IBF super flyweight championship match niadtong Hulyo 18 didto sa Don Haskins Convention Center sa El Paso, Texas. (BANAT NEWS)
- Latest
