Allied, Iesieken abante semifinals sa Triple-A caging

CEBU, Philippines – Awtomatik na nga nakasud sa semifinals ang Allied ug ang Iesieken human migawas isip top two seeded teams pagtapos sa elimination round sa Triple-A Christmas League 2015 basketball tournament sa miaging adlaw didto sa Kimwa gym sa Barangay Subangdaku,  dakbayan sa Mandaue.

Ang Allied unang mipasilong sa landong sa semifinals human sa yano nilang kadaugan batok sa Limasawa, 59-47, samtang ang Iesiken miiskor og 10 puntos nga kadaugan batok sa Gallego, 55-45.

Si Erwin Budiongan mikamada’g 12 puntos aron mangu sa Allied sa labing unang higayon. Si Gilbert Lesin mitimang og 10 puntos alang sa Allied nga nakapanemaho sa ilang sayong kadaugan human milabaw og 14 puntos, 57-43 sa nahabiling 4:00 minutos sa finals period.

Ang Limasawa gipangulohan  ni Francis Palero ug mao lang ang nakaiskor og double digits  sa iyang 14 puntos.

Sa laing bahin, ang Iesieken gipangulohan gihapon ni Mai Suson nga miburak og 18 puntos, gisundan ni Orly Navarro nga adunay 14 puntos.

Ang Iesieken ni playing coach Dandy Tagalog maoy midiktar sa duwa, apan nahulga sila dihang misikit ang Gallego, 42-43 human sa itsa ni Dr. Raul Monterroyo sa nahabiling  3:25 sa fourth quarter. Apan sila si Suson ug Navarro nagkumbinar og mga puntos aron bingaton og balik ang ilang labaw, 49-44 sa katapusang dos minutos sa duwa.

Sila si Rey Gonzaga ug Tawing Grafe mitusak og 16 ug 15 puntos  aron pangulohan ang Gallego.

Sa laing aksiyon, si Rex Gonzaga mipabuhagay og 19 puntos alang sa Gilas ‘D Boys nga mipukan sa Triple-A, 51-40.

Hinuon, ang mga pilderong koponan may purohan pa nga makaangkon sa katapusang duha ka luna sa semis kun modaog sila  sa duwa nila sa quarterfinals karong Domingo.

Ang Limasawa makigbatok sa Triple-A sa pasiunang duwa, samtang ang Gallego makigsangka sa Gilas. Ang modaog tali sa Limasawa ug Triple-A maoy moharong sa No. 1 team Allied sa semifinals, samtang ang modaog sa Gallego ug Gilas mosangka sa No. 2  Iesieken.

Ang liga gipasiugdahan sa Los Amigos Basketball  Association kon Triple-A ubos  sa bendisyon sa ilang presidente nga si Gilbert Lesin. Ang mga duwa gipadagan nilang league commissioners Jun Arceo ug  Cris Martinito inabagan ni Orly Navarro ug ingon man nilang Chang Tejero, Chigie Gesulga, Arman Gonzaga ug Kenneth Ypanto.

Puntos Matag Usa

Unang duwa:

ALLIED (59) – Budiongan 12, Lesin 10, Recto 8, Madrid 8, Cabahug 8, Mendoza 5, Secad 4, Retiza 2, Ygoña 2.

LIMASAWA (47) – Palero 14, G. Armamento 8, Ontong 7, Cabahug 6, Cabucos 4, Yares 4, Cardoza 2, Armamento 1.

Ikaduhang duwa:

GILAS (51) – R. Gonzaga 19, Estremos 8, Englis 6, Macapas 6, A. Gonzaga 4, Dakay 4, Martillan 3, Baclay 1.

TRIPLE-A (40) – Monternel 9, Bukiron 8, Damolo 6, Lurica 6, Romagos 5, Nova 3, Dicdicacn 2, Gulbin 2.

Ikatulong duwa:

IESIEKEN (55) – Suson 18, Navarro 14, Almario 9, Arche 6, Grafe 6, Tagalog 2.

GALLEGO (45) – Gonzaga 16, Grafe 15, Manatad 8, Monterroyo 2, Bordaje 2, Pastoriza 2. (BANAT NEWS)