CEBU, Philippines - Mipahaguros og 45 puntos si James Harden, ang nuybe puntos sa overtime aron baswaton ang Houston Rockets ngadto sa 108-103 nga kadaugan batok sa Portland TrailBlazers pipila lang ka oras human taktaka ang ilang head coach nga si Kevin McHale sa usa ka kulba-hinam nga duwa sa NBA kagahapon didto sa Toyota Center sa Houston, Texas.
Si Corey Brewer mipasud sa iyang off-balance 3-pointer nga mihatod sa duwa ngadto sa overtime ug si Harden maoy mikontrolar sa duwa diin mihimo siya’g 11 ka assists, walo ka rebounds sa usa ka emosyonal nga adlaw didto sa Toyota Center.
Nabaraw ni Brewer ang ikalima untang sagunson nga pilde sa Rockets dihang iya kining gihatod sa overtime sa nahabiling 0.9 segundo sa regulasyon aron matabla ang iskor, 99-all.
Pipila ka oras human taktaka si McHale, ang Rockets nakahimo’g daghang turnovers ug wala mangigo sa ilang tirada sa gawas.
Si interim coach J.B. Bickerstaff, anak sa dugay na kaayong NBA coach nga si Bernie Bickerstaff misilbe sa iyang unang duwa isip head coach.
Ang Blazers nahiagum na sa ilang ikapitong sunod-sunod nga pilde, ang labing taas nilang losing streak sukad niadtong 2012-2013 season diin nakahimo sila'g 13-game skid.
Si Damian Lillard maoy nangu sa Blazers sa iyang 23 puntos, samtang si C.J. McCollum miamot og 19 ug si Al-Farouq Aminu adunay 16 puntos .
Si Trevor Ariza miposa og 18 puntos alang sa Rockets, samtang si Brewer mitampo’g 16 puntos.
Didto sa Chesapeake Energy Arena, ang Oklahoma City Thunder mipakaging sa New Orleans Pelicans, 110-103 ubos sa pagpangulo ni Russell Westbrook, kinsa mituhog og 43 puntos.
Si Enes Kanter midugang og 24 puntos ug may 14 ka rebounds alang sa Thunder.
Mitusik og 30 puntos si Ryan Anderson aron pangulohan ang Pelicans.
Midaog sab ang San Antonio Spurs batok sa Denver Nuggets, 109-98, ang Dallas Mavericks midaog batok sa Boston Celtics, 106-102. (BANAT PALARO)