Convergys Converters kampiyon sa 11th E-League
CEBU, Philippines - Giusban og parot sa Convergys Converters ang Teleperformance All Stars, 71-63 aron paglangkat sa kampiyonato sa Elite Classic sa 11th CSCC E-League men’s basketball tournament niadtong Domingo didto sa City Sports Club-Cebu gym.
Si Franz Dione Dysam mitali og 10 sa iyang 19 puntos sa katapusang kuwarter, apil na ang pito ka sagunson nga puntos sa nahabiling dos minutos sa duwa hinungdan nga siya maoy gibayaw nga Finals MVP.
Alkanse og nuybe puntos human sa ikatulong kuwarter, 45-54, ang All Stars milusad og mainit nga rally hinungdan nga nakatabla kini, 63-all, apan mao na diay kadto ang katapusan nilang utong gumikan kay si Dysam miduslit sa kayo sa nagbagang 8-0 run nga maoy nakasalbar sa Converters. Si Lourenz Limpangog mipugnit og 18 puntos ug ni Sherwin Anghay mikudlit og 15 puntos sa Converters.
Sa laing bahin, si Franco Angelo Cipriano sa Lexmark Stallions maoy labing nagmaya sa tanang individual awardees human siya gikoronahang regular season MVP. Iyang gikauban sa elite Mythical Five mao ang iyang teammate nga si Sylvester Millevo, Ryan Veloso sa Teleperformance ug silang Ildefonso Bulangis, Jr. ug Archie Batua sa Accenture.
Si Cipriano sab maoy 'Tapal King' sa average niining 2.86 blocks matag duwa ug ingon man hari sa rebounding sa napatik niining 11.86 rpg.
Si Dennis Poquita sa SSI Warriors maoy lider sa steals (3.71spg), si Vill Duero sa Lexmark maoy labing tang-an kun assists maoy hisgutan (4.25apg), samtang si Lawrence Agas sa SSI maoy scoring champion sa natali niining 22.38 puntos matag duwa. (BANAT NEWS)
- Latest
