Warriors wala pa’y pilde

CEBU, Philippines - Mitusak og 37 puntos si Stephen Curry  aron pangulohan ang defending champion Golden State Warriors ngadto sa  ika-12 nilang sagunson nga daog sa National Basketball Association.

Ang Warriors mipukan sa Toronto Raptors  sa iskor nga 115-110 kagahapon didto sa Oracle Arena sa Oakland, California.

Si Klay Thompson mipupo’g 19 puntos, samtang si Andrew Bogut  miamot og 13 puntos alang sa Warriors, kinsa mihimo’g  best  start nga 12-0 sa ilang franchise.

Naglisud una ang Warriors tungod kay mi-rally ang Raptors gikan sa ilang 18 puntos ngadto na lang sa usa ka lugas nga biya. 

Silang Kyle Lowry ug DeMar DeRozan parehong mibahog og 28 puntos aron pangulohan ang Raptors, kinsa napilde na og lima sa ilang pito ka duwa sukad sa ilang 5-0 start.

Nakalabaw sa makadiyot og tres puntos  ang Raptors  sa second half human sa duha ka free throws ni Lowry,  apan gitabla sab dayon kini ni Andrew Bogut pinaagi sa alley-oop gikan kang Draymond Green.  Mituhog sa ikalimang triple  si Curry aron bingaton pagbalik ang ilang labaw.

Didto sa Palace of Auburn Hills sa Michigan,  ang host Detroit Pistons midaog batok sa Cleveland Cavaliers sa iskor nga 104-99.

Si Andre Drummond maoy nangu sa Pistons sa iyang 25 puntos uban sa iyang 18 ka rebounds, samtang si LeBron James mao sab ang nangu sa Cavs sa iyang 30 puntos, diin ang 23 niini didto  niya nahimo sa first half.

Ang free throw ni Drummond sa nahabiling 2:07 sa duwa maoy naghatag sa Pistons og 98-97 nga bentaha ug  miburot pa kini ngadto sa  102-99  sa katapusang 13.8 segundos. 

Si Reggie Jackson mihakot og  23 puntos uban sa 12 ka assists, samtang  si Ersan Ilyasova miugkat og 20 puntos aron tabangan ang Pistons nga maputol ang ilang upat ka sunod-sunod nga pilde.

Ang Cavs nahiagum sa ilang ikaduhang pilde human modaog og sagunsong walo ka duwa.

Si Kevin Love mihimo’g 19 puntos alang sa Cavs, samtang silang JR Smith ug Mo Williams miamot og 15 puntos matag usa.

Ang Cavs niduwa nga wala  silang Kyrie Irving ug  Iman Shumpert  tungod sa injury.

Sa laing mga duwa, ang Denver Nuggets miihaw sa New Orleans Pelicans, 115-98, ang Brooklyn Nets mibuntog sa Atlanta Hawks, 90-88, midaog sab ang Minnesota Timberwolves batok sa Miami Heat, 103-91.

Ang New York Knicks midaog batok sa Charlotte Hornets, 102-94, samtang gilubong sa Washington Wizards ang Milwaukee Bucks sa iskor nga 115-86. (BANAT NEWS)