Barako Bull misungag sa Mahindra Enforcers
CEBU, Philippines – Pabiling init ang Barako Bull Energy Cola human nila gisakmit ang ikaduha nilang sunod-sunod nga daog batok sa Mahindra Enforcers, 93-85 sa nagpadayong aksiyon sa 2015 PBA Philippine Cup didto sa Alonte Sports Arena sa Laguna.
Midaro og 26 puntos si RR Garcia aron pangulohan ang Barako nga wala gyud mihatag og kahigayonan sa Mahindra nga makatilaw og labaw.
Gikan sa 48-41 nga abante sa first half, ang mga batos ni coach Koy Banal nanginit sa third period diin miposte sila og 10 puntos nga labaw 56-46 paingon sa final period.
Usa usab ka 9-4 rally nga gipangulohan ni Garcia ug Mac Baracael ang gihimo sa Barako sa final period aron moposte og komportable nga bentaha, 82-69.
Sa maong kadaugan, ang Barako misaka sa ikaunom nga dapit sa standing sa ilang 3-2 win-loss record, samtang ang Mahindra ni Pinoy boxing icon Manny Pacquiao nahagsa sa 1-4 nga baraha. (BANAT NEWS)
- Latest
