MegaBond, 7-0 na sa A+EBA 1st Corporate Cup
CEBU, Philippines - Ang MegaBond milampurnas sa CMI, 71-54 aron pagpabiling wa’y pilde sa pito ka duwa sa Architects+Engineers Basketball Association's 1st Corporate Cup didto sa University of San Carlos-main gym.
Si Loreneil Tequin miratsada’g 26 puntos sa MegaBond nga mipauwan og mga puntos sa ikaduhang kuwarter aron paglubong sa CMI. Labaw lang og dos puntos, 18-16, ang MegaBond milusad og 24-8 rally aron moabante’g 18 puntos sa halftime, 42-24.
Mipakita og maayong labok ang CMI sa ikatulong hunat sa duwa, apan wala magpabitin ang MegaBond aron paglansang niini og 17 puntos nga kadaugan.
Si Jun Villacorta adunay 12 puntos alang sa CMI, nga nagsolo gihapon sa ikaduhang dapit bitbit ang 5-2 win-loss record.
Sa laing mga duwa, ang Dorma mipakaging sa Davies Paints, 71-66, samtang ang Fenestram mibuntog sa Phoenix, 67-59. Ang Dorma nagtangag na karon og baraha nga 4-3 ug ang Fenestram adunay record nga 3-4. Ang Davies Paints nakatilaw sa ikalima niining pilde uban ang duha pa ka daog, samtang ang Phoenix wala pa’y daog sa pito ka duwa.
- Latest
