Gallego milubong sa Gilas ‘D Boys
CEBU, Philippines - Misakmit sa ilang ikaduhang daog ang team Gallego pinaagi sa paglubong sa Gilas ‘D Boys, 66-51 sa Triple-A Christmas League 2015 basketball tournament niadtong Domingo didto sa Kimwa gym sa Barangay Subangdaku, Mandaue City.
Dos puntos lang ang labaw sa Gallego paghuman sa unang 10 minutos sa duwa, 13-11, apan mipabuhagay sila og mga puntos sa mosunod nga mga kuwarter aron molansang og 41-26 nga bentaha.
Si Tawing Grafe mao na sab ang pabilo sa Gallego nga midagkot og 23 puntos. Nakatampo sab og daku nga iskor si Rey Gonzaga, kinsa mikabkab og 15 puntos, diin ang 11 niini iyang natala sa first quarter .
Si Dr. Raul Monterroyo miduslit og 10 puntos, lakip ang usa niya ka triple nga nakainat sa ilang labaw ngadto sa 18 puntos, 46-28 sa nahabiling sayes minutos sa third period.
Ang Gilas gipangulohan ni Rex Gonzaga, kinsa mirehistro’g 16 puntos, apan wala siya makakuha og maayong suporta gikan sa iyang kaubanan.
Ang Triple-A Christmas League nga gibendisyonan sa ilang presidente nga si Gilbert Lesin duwaon matag adlaw’ng Domingo.
PUNTOS MATAG USA
GALLEGO (66) – Grafe 23, Gonzaga 16, Monterroyo 10, Carvajal 7, Manatad 4, Gallego 2, N. Ybañez 2, Pastoriza 2.
GILAS (51) – Gonzaga 16, Chavez 8, Turno 7, Manatad 5, Dakay 5, Macapas 4, Balagon 3, Englis 3.
- Latest
