Warriors, 9-0 na

CEBU, Philippines - Gilubong sa defending champion Golden State Warriors ang Memphis Grizzlies,  100-84  aron magpabiling wa’y pilde sa nagpadayong National Basketball Association kagahapon didto sa FedEx Forum sa Memphis, Tennessee.

Medyo gidemalas si Stephen Curry sa  unang duha ka kuwarter, apan iya kining gibawi  sa second half  aron mokutlo’g 28 puntos ug ingon man pangulohan ang  Warriors.

Gawas sa iyang puntos, si Curry mihimo   og lima ka rebounds, lima ka assists ug lima sab ka steals.

Ang   Warriors (9-0) medyo gikulbaan sa makadiyot dihang nakasikit ang Memphis, 56-57 sa   duha ka free throws ni Zach Randolph  sa third quarter.

Apan human sa  free throws ni Randolph, kinsa mihimo’g 19 puntos ug may pito ka rebounds, si Curry mipabuhagay og 17 puntos  aron  inaton pagbalik ang ilang labaw  ngadto sa 11 puntos 74-63 didto sa final period.

Ang swingman nga si Andre Iguodala miposa og 20 puntos gikan sa bench alang sa Warriors, samtang si Harrison Barnes midugang og 19 puntos.

Si Mark Gasol maoy nangu sa Grizzlies sa iyang season-best 26 puntos uban sa pito ka rebounds, samtang si Tony  Allen miamot og  15 puntos. Ang ilang starting point guard nga si Mike Conley  igo lang mihimo’g kuwatro puntos.

Sa laing mga duwa, gipatapsingan sa Denver Nuggets ang Milwaukee Bucks, 103-102, gibihag sa Brooklyn Nets ang Houston Rockets, 106-98, ang  Atlanta Hawks midagit  sa New Orleans Pelicans, 100-91.

Ang  Indiana Pacers midaog batok sa Boston Celtics, 102-91, ang Orlando Magic nakaipsot  sa Los Angeles Lakers, 101-99, midaog sab ang Sacramento Kings batok sa Detroit Pistons, 101-92. Ang San Antonio Spurs mipukan sa Portland TrailBlazers, 113-101,  ang Toronto Raptors mipilde sa Philadelphia Sixers, 119-103 ug ang Charlotte Hornets nakaipsot sa New York Knicks, 95-93.  (BANAT PALARO)