Cebuana mihimo’g kasaysayan sa Rome dancefest

CEBU, Philippines – Ang Cebuana dance athlete nga si Rhea Marquez ug ang iyang partner nga si Jun Julius Obero sa Manila mipakurat sa kadaghanan human ilang giaswat ang Pilipinas ngadto sa makasaysayanong kadaugan sa 2015 International Paralympic Committee (IPC) Wheelchair DanceSport World Championships  niadtong Nobiyembre 6-9 didto sa Federal Technical Center-Bocciodromo Via Fiume Bianco sa Rome, Italy.

Si Marquez, lumad nga taga Barangay San Isidro dakbayan sa Talisay ug si Obero mipakugang sa  tandem  nilang Galina Ryzhkova ug Viacheslav Osipov sa Russia hinungdan nga sila maoy gikoronahang world champion sa combi freestyle class 2.

Mao kadto ang labing unang gold medal sa Pilipinas sukad magsugod ang maong torneyo sa IPC pito na ka tuig ang milabay. Sila si Ryzhkova ug Osipov maoy mibira sa silver medal, samtang ang ilang kababayan nga sila si Svetlana Kukushkina ug Maksim Sedakov maoy midaog sa bronze.

“Na-shock gyud mi sa dihang kami maoy gitawag nga World Champions,” matud pa sa 22-anyos nga si Marquez sa mensahe niini nga gipatik sa www.paralympic.org, ang opisyal nga website sa maong event. “Wa mi kabalo unsay isulti. Napuno mi sa emosyon karon ilabi kay bag-o pa man mi nga partners.”

Sila si Marquez ug Obero gipares sud lamang sa duha ka semana sa wala pa ang kompetisyon. Apan bisan pa man sa limitado nilang oras pagbansay-bansay ug kakuliang pinansiyal, nakasugakod sila sa tanang mga pagsulay dayon na ngadto sa dili  hikalimtan nga kalampusan alang sa nasudnong Pilipinhon.

“Dili gyud masabtan ang among gibati nga nagbarog atubangan sa crowd nga ni-cheer namo og maayo samtang giisa ang bandila sa Pilipinas ug gitukar ang atong nasudnong awit sa labing unang higayon sa kasaysayan sa maong kompetisyon,” dugang pa ni Marquez. "Sa among nakab-ot, pasalamat mi labaw sa tanan sa Ginoo kay siya gyud ang naggiya namo niining tanan. Mapasalamaton sab mi sa among coach nga si Genice Marquez nga mao gyud ang nangusog ug nangita’g paagi aron lang gyud mi makalarga.”

Sa wala pa mikumbati sa Roma, si Rhea ug ang iyang   manghod  nga  si Roque Marquez, Jr. misakmit og bulawang medalya sa Cebu Word DanceSport Federation (WDSF) Open ug 8th DanceSport sa Sugbo niadtong Septiyembre 19 didto sa Waterfront-Cebu City Hotel and Casino.

Si Marquez produkto sa barangay-based grassroots development program sa Cebu City Sports Commission ubos sa pagdumala ni Edward Hayco. Nakasignit siya og athletic scholarship sa De La Salle University pinaagi sa dancesport ug karon gibayaw na siya tibuok kalibotan sa maong natad sa paugnat sa kusog. (BANAT NEWS)