Durant injured

CEBU, Philippines – Parehong midaog ang Oklahoma City Thunder ug ang New Orleans Pelicans, apan pulos sab wala makatiwas og duwa silang Kevin Durant ug si Anthony Davis nga sulagma sab kaayo  nga mibiya atol sa first half sa ilang duwa batok sa tagsa-tagsa nila ka karibal sa National Basketball Association kagahapon sa duha ka managlahing binyu.

Si Durant migawas sa korte sa halftime tungod sa strained left hamstring.

Human mobiya si Durant, ang iyang teammate nga si Russell Westbrook maoy miabaga  diin  nakahimo na sab og triple-double pinaagi sa iyang 22 puntos, 11 ka assists  ug 11 sab ka rebounds aron pangulohan ang Thunder ngadto sa 125-101 nga kadaugan batok sa Washington Wizards.

Si Durant, ang ikaduha nga scoring leader sa NBA sunod ni  Stephen Curry sa Golden State Warriors, mihipos og 14 puntos uban sa iyang 10 ka rebounds  sa wala pa mogawas sa korte. Matud pa ni Durant nga usa lang kadto ka gamay nga injury ug iya kining ipailawom sa MRI ugmang adlawa.

Sa laing bahin, si Davis mihimo’g 17 puntos  alang sa Pelicans nga mikulit sa labing una nilang daog sud sa pito ka duwa human ilang gilubong ang Dallas Mavericks sa iskor nga 120-105 didto sa New Orleans Arena sa New Orleans, Louisiana.

Si Davis maoy nagtimon sa 1-6 nga Pelicans, kinsa naglabaw og 18 puntos atol sa halftime. Namintinar nila ang double digits nga labaw hangtod sa paghuman sa duwa.

Ang veteran nga si Dirk Nowitzki mao ang nangu sa 3-4 nga Mavericks nga miburak og 18 puntos.

Sa lain pang mga duwa, ang Cleveland Cavaliers nakaipsot batok sa Utah Jazz, 118-114,   ang Miami Heat  milubong sa Los Angeles Lakers, 101-88, midaog sab ang  New York Knicks human makaipsot sa Toronto Raptors, 111-109, ang  Boston Celtics  milubong sa Milwaukee Bucks, 99-83 ug ang Charlotte Hornets   batok sa Minnesota Timberwolves, 104-95. (BANAT NEWS)