Bryant huling laro na sa Madison Square Garden: Knicks umeskapo sa Lakers

NEW YORK--Nagsalpak ng three-pointer si Langston Galloway para ihatid ang Knicks sa 99-95 panalo laban sa Los Angeles Lakers sa sinasabing huling laro ni Kobe Bryant sa Madison Square Garden.

Sinabi ng 37-anyos na si Bryant, naglalaro sa kanyang ika-20 at posibleng pinakahuling season sa Lakers, na ayaw niyang maging farewell tour ang 2015-16.

“It felt amazing,” sabi ni Bryant na pinalakpakan ng mga fans sa tuwing matatanggap ang bola.

Ito rin ang natanggap ni Bryant sa Brooklyn nang labanan ng Lakers ang Nets dalawang gabi na ang nakakalipas.

Sa Madison Square Garden ginawa ni Bryant ang kanyang unang NBA All-Star Game noong 1998 at umiskor ng 61 points laban sa Knicks noong February 2, 2009.

Tumapos ang five-time NBA champion na may 18 points mula sa 6-of-18 shooting, habang kumolekta si center Roy Hibbert ng 18 points at 9 rebounds kasunod ang 10 markers ni second-year guard Jordan Clarkson.

Makaraan ang laro ay nakipagyakapan si Bryant sa mga dating Lakers colleagues na kinabibilangan nina ex-coach Phil Jackson, ngayon ay Knicks president at dating teammate  Sasha Vujacic.

Pinamunuan ni forward Carmelo Anthony ang Knicks sa kanyang game-high 24 points kung saan ang 11 dito ay kanyang ginawa sa fourth quarter.

Sa iba pang resulta, tinalo ng Cleveland Cavaliers ang Indiana Pacers, 101-97; binigo ng Miami Heat ang Toronto Raptors, 96-76; dinaig ng Oklahoma City Thunder ang Phoenix Suns, 124-103 at pinatumba ng Detroit Pistons ang Portland Trail Blazers, 120-103.