Lakers pilde sa Knicks

CEBU, Philippines - Napilde ang  Los Angeles Lakers batok sa New York Knicks, apan si Kobe Bryant nakaangkon og makabungog nga ‘cheers’ nga maoy posibleng katapusan niyang duwa didto sa New York City.

Ubos sa pagpangulo ni Carmelo Anthony, ang Knicks midaog sa iskor nga 99-95.

Posible sa pagka karon, ang   paghangop ni Bryant ngadto ni Anthony maoy panamilit  tungod kay posibleng moretiro na siya sunod season.

Si Bryant miposa og 18 puntos sa maong duwa nga layo ra kaayo sa iyang average nga 30.7 puntos matag duwa. Kanunay siyang makahimo’g labing menos 40 puntos sa tulo ka higayon didto sa maong arena.

Ang 37-anyos nga superstar, kinsa wala pa gyud moklaro nga   moretiro human sa kasamtangan nga season, misipyat sa iyang duha ka tirada. Kaduha sab siya gi-foul ni Anthony atol sa 11-0 run nga gihimo sa New York nga miinat sa labaw gikan lang unta sa tres puntos ngadto na otso puntos, 98-90.

Si Anthony nga nangu sa Knicks miiskor og 24 puntos.     Sila si Jose Calderon, Robin Lopez ug Langston Galloway pulos mirehistro og 14 puntos  alang sa Knicks kansang nagkutay nga tulo ka pilde nabugto na.

Mao usab kini ang unang daog sa Knicks sa ilang korte karon nga season.

Si Bryant igo lang mihimo’g 6-for-19 ug ang iyang bati nga duwa dili makapapas sa mga paghandum didto sa New York.

Sa lain pang mga duwa sa NBA kagahapon, ang Oklahoma City Thunder milubong sa Phoenix Suns, 124-103, gilubong sab sa Detroit Pistons ang Portland TrailBlazers, 120-103,  ang Cleveland Cavaliers  mipukan sa Indiana Pacers, 101-97 ug  ang Miami Heat  mipakaging sa  Toronto Raptors sa iskor nga 96-76.