Bulls misungay sa Thunder

CEBU, Philippines - Midaro og 29 puntos si Derrick Rose aron pangulohan ang Chicago Bulls nga misungay sa Oklahoma City Thunder, 104-98 sa ilang duwa sa NBA  kagahapon didto sa United Center sa Chicago, Illinois.

Si Rose miiskor og 10 puntos sud sa katapusang tres minutos og 50 segundos human lang nila usiki ang ilang 10 puntos nga labaw.

Nakatabla unta ang Thunder sa kapin singko minutos ang nahibilin  nga oras sa duwa, apan maayo kaayong nakaduwa si Rose ilabi na sa fourth quarter diin mihimo siya’g 12 puntos aron masumpo ang 33 puntos ni Kevin Durant.

Samtang igo lang untang naglabaw ang Bulls og dos puntos, 98-96, kalit lang mihimo’g sagunson nga puntos si Rose aron mainat ang ilang labaw.

Human sa jumpshot ni Durant, mibawos sab dayon og hook shot si Pau Gasol sa katapusang 34 segundos aron maselyado ang kadaugan sa Bulls.

Nagsul-ob lang gihapon og maskara si Rose isip proteksiyon sa iyang na-fractured nga orbital, apan bisan pa niana, nangigo gihapon siya sa iyang mga tirada.

Si Jimmy Butler, mihimo’g career-high nga 21 puntos atol sa first half points nga naglakip sa upat ka triples. Sa kinatibuk-an si Butler adunay 26 puntos.

Ang katimbang ni Durant nga si Russell Westbrook midugang og 20 puntos uban ang 10 ka assists.

Ang Bulls  labaw og usa ka palito, 78-77 sa sayong bahin sa fourth period  ug didto nagsugod ang pagmangtas ni Rose aron molabaw sila’g 10 puntos, 87-77 sa nahabiling 8:51  sa duwa.

Apan dali kaayo kining gitubag sa Thunder pinaagi sa ilang  13-3 run ug nakatabla pa, 90-all.

Ang forward sa Bulls nga si Doug McDermott mihimo sa iyang unang career start alang sa Chicago, kinsa maoy mo-host sa Minnesota Timberwolves karong adlawa.

Sa laing mga duwa, ang Miami Heat mipakaging sa Minnesota Timberwolves, 95-84, gilubong sab sa Charlotte Hornets ang Dallas Mavericks, 108-94 mao sab ang Portland TrailBlazers nga milubong sa Memphis Grizzles, 115-96 ug ang Utah Jazz midaog human sab nila gilubong ang Denver Nuggets, 96-84.