Donaire milugway kontrata sa Top Rank
CEBU, Philippines - Si four-division world champion Nonito Donaire Jr. makigharong batok sa Mehikanong si Cesar Juarez karong Disyembre human kini mipirma og dugang lugway sa iyang kontrata ubos sa Top Rank Inc. ni Bob Arum.
Matud pa ni Dan Rafael sa ESPN.com, nga si Donaire moharong ni Juarez karong Disyembre 11 didto sa San Juan, Puerto Rico.
Kabahin kini sa bag-o niyang misyon nga mosakmit og laing world title.
Nagkanayon si Arum nga mismo si Donaire ang miadto sa iyang opisina aron pirmahan ang contract extension nga molanat og kapin sa usa ka tuig.
Human siya gipatukay-ang sa Jamaican star nga si Nicholas Walter sa ikaunom nga hugna sa miaging tuig, si Donaire impresibong nakabangon pinaagi sa paglansang og duha ka sunod-sunod nga daog.
Si Donaire mipadayag nga ang paglugway niya sa iyang kontrata sa Top Rank makahatag kaniya og higayon aron mamahimong world champion pag-usab.
Kun ugaling modaog batok ni Juarez, si Arum mibutyag nga posibleng makahatag kini ni Donaire og higayon aron hagiton si WBO featherweight champion Vasyl Lomachenko. (BANAT NEWS)
- Latest
