Warriors mohimo’g motorkada

CEBU, Philippines – Naglutaw pa sa kalipay human sa ilang makasaysayanon nga kadaugan dihang  ilang nabugto sa  57 ka tuig   nga title drought sa Cebu collegiate basketball, ang bag-ong gikoronahan nga Cebu Schools Athletic Foundation, Inc. (CESAFI) champion University of San Carlos Warriors,  mopahigayon og motorkada ugmang adlawa sugod sa alas-8:30 sa buntag.

Manukad ang   Warriors sa USC main quadrangle dayon moadto sa USC-Technological Center sa Talamban diin adunay usa ka Thanksgiving Mass ang himuon sa alas-10 sa buntag.

Pangulohan sa import niiing si Shooster Olago, ang unang   foreign player nga napiling MVP sa   labing daku ug inilang collegiate league dinhi sa Sugbo.

Ang Warriors misakmit sa una nilang titulo sukad sa 1958 dihang ilang gipukan ang University of the Visayas Green Lancers, 64-53 sa deciding match sa “best-of-five” finals series niadtong Oktubre 20 didto sa Cebu Coliseum.

Kabahin sa una nilang kampiyonato sa kasaysayan niadtong lima na ka dekada ang milabay, mao ang kanhi coach ug karon team consultant  nga si Julian A. Macoy.

Gawas sa mga players, ilang mga ginikanan ug kahigalaan mosakay usab sa open coaster gikan sa USC-Main paingon sa Talamban.

Tapuson sa Warriors administration ang ilang adlaw sa kalipay pinaagi sa ‘victory party’ inig ka gabii diha sa Big Hotel sa north reclamation area. (BANAT NEWS)