Bulldogs 3-0 na sa NABC

CEBU, Philippines – Midaog na sab ang 1994 Bulldogs kaniadtong Domingo human sila maka-ipsot batok sa 1996 Chubbies sa iskor, 59-54 sa Division 2 sa ikaduhang semana sa nagpadayon nga NABC SINULOG HOMECOMING CUP didto sa USC North Campus gym sa dan General Maxilom avenue, ning dakbayan.

Sa laing bahin, kaniadtong Biyernes, mikulit sa ilang ikaduhang daog ang   2007  Waybus human ilang gipatapsingan ang 2010 Pioneers, 79-78 sa Division 3 ug midaog sab ang 2005 Chameleons batok sa 2003 Dos Mil Tres, 54-47 ubos gihapon sa Division 3.

Wala'y duwa kaniadtong Sabado tungod kay nagsaulog sa ilang PTCA Family Day ang USC-North Campus.

Sa laing mga duwa kaniadtong Domingo, mikulit sa ilang ikuduhang daog ang Division 1 defending champion 1985 Legends batok sa 1987 Bros diin miburak og 35 puntos ang ex-pro ug kanhi USC Warriors nga si Lou Regidor ug midugang og 10 puntos si Remir Mendoza.

Duha sab ka players sa Bros ang mihimo'g double figures nga silang Ramon Tabares ug Noel Demecillo sa ilang 14 ug 10 puntos matag usa.

Sa laing sangka sa Division 1, midaog ang 1988 Barakos nga gipangulohan ni Edmund Odullo batok sa bag-ong team ang 1989 Spartans sa iskor, 73-57.  Si Odullo maoy nangu sa Barakos sa iyang Odulio 29 puntos.

Gilubong sa 1998 Sipat ang 1995 Pirates sa iskor, 73-44 sa Division  2 samtang  sa Division 3,  gilubong sa 1999ers ang Legendary Lions sa iskor, 67-44 ug midaog ang 2008 Fly Boys batok sa 2014 Underdogs, 76-63 aron makigtabla sa 2004 Rebels sa unang pwesto sa 2-0 nga baraha samtang ang Underdogs aduna karo'y 1-1 nga baraha.

Lain pa gyung sangka sa Divison 3 nagpakita nga midaog ang 1993 Dragons batok sa 1990 Titans sa iskor, 92-57 diin pulos mibahug og double figures silang Roy Jumao-as, John "Tikoy" Soon ug Jade Ylanan aron pakgangon ang 33 puntos gikan sa Titans nga si ex-Warrior Engel Sievert.

Ang  1992 Littel Rascals midaog batok sa 1991 BAI sa iskor, 79-61 sa Division 1 ug midaog ang 1989 Mighty Geeks batok sa 1984 Knights, 71-66 ug sa Division 2, midaog ang Millenium 2000 batok sa defending champion Dos Mil Uno,  63-54. (BANAT NEWS)