Bisdaks nanghawod

CEBU, Philippines – Nakuha pagbalik sa Team Visayas ang overall championship  pagtapos sa 7th Milo Little Olympics National Finals sa miaging adlaw didto sa Laguna Sports Complex sa Sta. Cruz, Laguna.

Gawas nga natambalan ang ilang kauhaw  human sa tulo ka tuig nga pagpaabot, ang Team Visayas miani sab og daghang Most Outstanding Athletes (MOA) awards ning maong tinuig nga sports conclave nga   gipaluyohan sa Nestle Phils.

Ang Bisdaks adunay 18 ka MOA awardees nga gipangulohan sa Sugbuanang swimmer nga si Raven Faith Alcoseba sa Talisay City Science High School, kinsa mikabkab og upat ka bulawan ug usa ka silver sa swimming event ug ang Ilongga trackster nga si Elvy Villagonzalo, ang bugtong double gold medalist gikan sa Team Visayas sa athletics pinaagi sa secondary girls long jump ug triple jump.

Lain  pang nanghawod sa ilang tagsa-tagsa ka sporting events mao sila si Ryan Doromal ug Tricia Merced gikan sa Southwestern University (badminton), Gabriel Claridad sa St. Roberts International School (basketball), Raniel Jay Perandos, Angel Naureen Bagano, Jeffu Dorog ug Laila Nadera sa University of San Carlos (chess), Enzo Ceniza sa Paref-Springdale (football), John Speed Eslao ug Viccel John Libradilla sa University of San Jose-Recoletos (scrabble) ug Canciano Llenos ug Florans Camacho (volleyball).

Nalakip sab sa top individual achievers gikan  sa Visayas mao sila si  Ariel Beronio sa Valladolid Elementary School, Sal Luiji Estrada sa University of Cebu ug  Mikee Rosa Regala  sa Saint Mary’s Academy-Capiz (taekwondo) ug Maxim Czarina Estay sa Catmon Integrated School (volleyball).

Sa laing bahin, ang MOA awardees gikan sa National Capital Region-South Luzon naglakip nilang Jerome Garcia, Alexandra Euste  ug Jonathan Pulido (athletics), Nestojan Tapales (badminton), Louell Jay Gonzales (basketball), Krystal Mae Maquidato  ug Jhazelle Louise Limenzon (gymnastics), John Michael Roca (sepak takraw), Ted Jacob Laminta ug  Richmond Santos (swimming), Mark Enrico Elludo  ug Jann Mari Nayre (table tennis), Dawson Ormoc (tennis)  ug Jose Antonio Madrigal (volleyball).

Sa Mindanao mao sila si Maxene Olango (badminton), Naz Rafele Angelo (football), Jerhard Isaw (sepak takraw),  Aubrey Shelan Bermejo (swimming), Aljon Bazar (taekwondo) ug Nash Agustines, Farrah Kris Emata ug Janelle Carmela Llavore  (tennis). (BANAT NEWS)