Lesjorcin wala pabangbang sa laba

CEBU, Philippines – Human sila masagunsoni’g tulo ka pilde, ang Lesjorcin mikulit sab dayon sa ilang  upat ka sunod-sunod nga daog pinaagi sa pagpukan sa Monterroyo, 81-75 sa second conference sa LABA President’s Cup 2015 sa miaging gabii didto sa Banilad Sports Center, Mandaue City.

Ligas kaayo ang ilang duwa diin nagpuli-puli kini’g sakmit sa labaw, apan sa kaulahian, ang Lesjorcin maoy mipatigbabaw sa kulbahinam nilang engkuwentro.

Si Barak Recto mao na sab ang nagmangtas aron pangulohan ang Lesjorcin pinaagi sa iyang 25 puntos. Kuyaw sab kaayong nakaduwa si Gilbert Lesin, kinsa mipatuasik og 13 puntos, mao sab si Richard Jordan nga mitusak og 12 puntos alang sa Lesjorcin nga nagbitbit na og 4-3 record.

Ang Lesjorcin nakakuha sab og suporta gikan nilang Lloyd Chavez ug Adie Cinco nga mitampo’g 11 ug 10 puntos matag usa.

Nakawang lang ang 28 puntos ni Tawing Grafe gumikan kay ang team Monterroyo wala makalahutay sa init kaayong engkuwentro.

Si Rex Gonzaga miambit og 15 puntos, samtang si Lindsay Bontilao mihirit og 12 puntos alang sa Monterroyo ni playing coach Dr. Raul Monterroyo.

Sa laing duwa, ang Lolypop-Larrobis nakaipsot sab sa sikit kaayong duwa batok sa Lakers, 77-70.

Gipangulohan ni Richard Madrid ang Lolypop-Larrobis nga miburak og 21 puntos, gisundan ni Canjo Chavez sa iyang 19 puntos.

Tulo sab ka player sa Lakers ang mihimo’g double figures pinangulohan ni Marcial Marturillas, kinsa mihakot og 21 puntos. Ang bigman nga si Eboy Quiñahan mitimbre’g 13 puntos ug si Raymond Carvajal mitimang og 11 puntos. (BANAT NEWS)