6 teams mosalmot sa Carcar Caging
CEBU, Philippines - Unom ka teams ang mosalmot sa 6th Mayor Nice Apura Cup Open basketball tournament nga sugdan sa Nobiyembre 4 didto sa Carcar Sports Complex.
Pangulohan kini sa University of the Visayas Green Lancers, ang runner-up sa bag-o lang natapos nga 15th Cebu Schools Athletic Foundation, Inc. (CESAFI). Lain pang mosalmot mao ang Paulo Luna Beach Resort, Jomangs, Espina Village, Abrenica Engineering ug ASPA-SCSIT.
Gibahin sila sa duha ka brackets diin moduwa sila og single round robin format sa elimination. Ang top two teams moabante sa double crossover semifinals. Ang mga modaog maoy magsangka sa kampiyonato.
Ang champion makadawat og P50,000, ang second ug third placers mobulsa’g P30,000 ug P20,000 matag usa, samtang ang fourth placer makaangkon og P10,000.
Sa press conference kagahapon didto sa Sunburst-Mango si league commissioner Julie Flores nagkanayon nga ang tanang teams mahimong mokuha og usa ka import.
Sa iyang bahin, gipasalamatan ni Mayor Apura ang tanang partisipanteng koponan sa ilang suporta sa torneyo.
- Latest
