Stallions 2-0 sa CHC, Tigers daog batok Kangaroos

CEBU, Philippines – Nasakmit sa White Stallions ang solong liderato human sila makalihay sa pagsungay unta sa Red Bull sa iskor, 71-68 kaniadtong Biyernes sa gabii sa nagpadayon nga Compostela Hardcourt  Club (CHC) Christmas League basketball tournament didto sa DM Reynes gym sa lungsod sa Compostela.

Sa sayo pa, gilubong sa Black Tigers ang Mentor Trunk Kangaroos, 70-52 sa ilang primerong duwa. Ang Black Tigers gilangkuban sa mga kapolisan sa Compostela ug wala sila makaduwa sa opening niadtong Oktubre 11 tungod kay kadaghanan kanila ang gihimong escort sa mga delegado sa Asia-Pacific Economic Conference kon APEC.

Kanunay nahimong kulbahinam ang kadaogan sa White Stallions tungod kay sa opening game, midaog sila pinaagi sa overtime, 63-62 batok sa Green Cobras ni CHC president Rey Gala.

Wala'y nakapiog sa razzle-dazzle game ni Gemilio Banzon kinsa maoy nangu sa White Stallions sa iyang 30 puntos samtang midugang og 10 puntos si Jun Abando.

Ang Red Bull kinsa adunay 0-2 nga baraha, gipangulohan ni Hanoy Tumulak kinsa mibahug og 18 puntos samtang miamot og 11 ug 10 puntos matag usa silang Rowen Tudio ug Arvin Serrano.

Sa laing bahin, si Glen Rosal maoy nangu sa Black Tigers sa iyang 17 puntos ug laing duha ka teammates ang midugang og double figures.

Ang Kangaroos (Mentors) nga gilangkuban sa mga maestro sa Compostela, gipangulohan ni Junrem Noval kinsa mihimo'g 16 puntos.

Puntos matag usa:

First Game:

Black Tigers (70) – Rosal 17, R. Mejias 12, Respecio 11, Goc-ong 8, Maglasang 7, Marolina 4, Mojado 4, Rondina 2, Edejer 2, Caturza 2, Canoy 1.

Kangaroos (52) – Noval 16, W. Libero 10, Capua 6, M. Librero 6, Zamora 6, Quino 4, Acaso 2, Roca 2.

Second Game:

White Stallions (71) – Banzon 30, Abando 10, Wagas 6, Calo 6, Lawas 5, Natad 4, Apas 3, Oposa 3, Vergara 2, Taneo 2.

Red Bulll (68) – Tumulak 18, Tudio 11, Serrano 10, Basilisco 7, Labuen 6, J. Castro 6, Brioso 4, Singson 2, Castro 2. (BANAT NEWS)