Lando mi-postpone sa PBA

CEBU, Philippines – Way nabuhat ang mga kadagkuan sa PBA kundi isibog ang petsa sa pagbukas sa 41st season nga gitakda unta kagahapon didto sa Smart Araneta Coliseum.

Tungod sa kusog nga hangin ug uwan nga dala sa bagyong Lando, ang PBA napugos pagkanselar lang una sa opening ceremony sa liga nga gisibog ngadto sa Miyerkules.

Ang Rain or Shine Elasto Painters ug Star Hotshots sa Miyerkules na magharung alang sa opening nga adto na ipahigayon sa Mall of Asia Arena.

"We shall have our formal opening on Wednesday with the same game to be played. The safety of our people is our priority," matud pa ni PBA Commissioner Chito Narvasa sa Philstar.com.

Ang PBA dali ra hinuong mihatag og refund sa mga fans nga nakapalit na og ticket alang unta sa opening kagahapon. Kini ang labing unang higayun sa kasaysayan sa PBA nga nakanselar ug gisibog ang opening ceremony tungod usab sa bagyo.

Hinuon wala kini panumbalinga sa mga opisyales ug players sa PBA nga mas naghuna-huna karon kun unsaon nila paghatag og ayuda ug tabang sa mga Pinoy nga maapektohan sa bagyo. (BANAT NEWS)