Taga-Sibonga moaway sab sa “undercard”
CARSON CITY, California – Mapasigarbuhon kaayo si Fil-Am boxer Bruno ‘The Aloha Kid’ Escalante Jr. nga usa siya ka Sugbuanon ug mapasalamaton sab nga nahimong kabahin sa makasaysayanong Pinoy Pride event sa Amerika diin mapasundayag ang iyang abilidad sa mas prestihiyosong bantawan. Si Escalante, lumad gikan sa Sibonga sa habagatang bahin sa Sugbo, makigsinukliay og kumo sa Mehikanong si Nestor Ramos sa undercard sa “Pinoy Pride 33: Philippines vs. the World” karong Sabado sa gabii (Domingo sa buntag oras sa Pilipinas) dinhi sa StubHub Center.
“Although I’ve been here in US since I was only eight years old, I always look back at my Cebuano roots,” batbat pa sa 27-anyos nga si Escalante. “And knowing that this Pinoy Pride boxing series started in Cebu, I’m very proud as a Cebuano to be part of this historic event.”
Si Escalante, ang kasamtangang IBA super flyweight champion, mihulagway sa iyang kaugalingon
nga boxer-puncher ug ang pagpilde ni Ramos maoy una sa iyang huna-huna sa unom ka hugna nilang
sangka. Sukad nakatilaw sa labing una niyang pilde pinaagi sa ‘unanimous decision’ ngadto ni Matthew
Villanueva niadtong Hunyo 2012, si Escalante mirehistro og walo ka sunod-sunod nga kadaugan. Iyang
gisakmit ang IBA 115-pound crown human gipukan si Michael Ruiz pinaagi sa ‘majority decision’ niadtong
Disyembre 7, 2013 didto sa Sports House sa Redwood City, California diin atua na siya karon nagbasi.
Ang labing prominente niyang biktima mao ang kanhi Mexican world champion nga si Lorenzo
Trejo, kinsa iyang gitumba sa ikaupat nga hugna aron pagdepensa sa iyang titulo niadtong Pebrero sa
miaging tuig sa Fox Theater didto gihapon sa Redwood. (BANAT NEWS)
=====
- Latest
