Eksplosibong gubat

CARSON CITY, California – Kalmado kaayo ang mga protagonista sa una nilang paghimamat apan seguradong usa ka mainit ug eksplosibong gubat ang moulbo unya sa ilang  sangka  sa makasaysayanong Pinoy Pride boxing card sa Amerika karong Sabado sa gabii (Domingo oras sa Pilipinas) dinhi sa StubHub Center.

Si two-division world champion Donnie ‘Ahas’ Nietes  (36-1-4, 21KOs) maoy mosalida sa main event diin iyang depensaan ang iyang WBO light flyweight  title sa ikawalo nga higayon batok sa Mexican challenger nga si Juan ‘Pinky’ Alejo (21-3, 13KOs).

“Ang ako ra gyud ikasulti ani mao nga buhaton nako kutob sa akong mahimo aron makapakita og maayo nga away kay importante kaayo para nako kining maong away,” matud pa ni Nietes atol sa final press conference kagahapon didto sa Carson Civic Center.

“Dili gyud ko kasulti kun ma-knockout ba nako siya (Alejo), pero kun dunay tsansa, aw ako gyud siya nga tumbahon,” dugang pa sa garbo sa Murcia, Negros Occidental.

Sa iyang bahin, si Alejo miyagyag og taas kaayong kompiyansa sa iyang kaugalingon sa dihang gipangutana sa iyang tsansa nga molampos batok ni Nietes, nga walay pilde-pilde sud sa milabay na nga 11 ka tuig.

“I’ve prepared for this fight and I am confident of winning. I know he (Nietes) is one of the best boxers out there, but I am a complete fighter and that is of my advantage,” batbat pa ni Alejo.

Ang managsuong ‘Prince’ Albert ug Jason ‘El Niño’ Pagara parehong mipatapsing sab og estorya sa ilang mga kontra nga pulos gikan sa Nicaragua.

Ang wala pa’y pildeng IBF Intercontinental super bantamweight champion nga si Albert Pagara (24-0, 17KOs) moharong ni William ‘Chirizo’ Gonzales (27-5, 23KOs), samtang ang iyang maguwang nga si Jason (36-2, 22KOs), ang WBO International super lightweight champion, makigsinukliay og kumo ni Santos ‘El Toro’ Benavides (25-7-2, 19KOs).

Sa laing bahin, ang sumusulbong nga bitoon sa ALA Stable nga si Mark ‘Magnifico’ Magsayo (11-0, 9KOs) wala sab mahadlok nga nakigtinubagay sa Mehikano niyang challenger nga si Yardley Suarez (13-0, 8KOs). Si Magsayo  manalipod sa iyang IBF Youth featherweight belt batok ni Suarez sa kulbahinam nga duwelo tali sa duha ka batan-on ug walay pildeng mga bitoon.