Monterroyo ikaduha na sa standing sa laba

CEBU, Philippines - Nakabawi dayon ang  team Monterroyo gikan sa ilang kapildihan ug gipahimungtan nila ang MS Motosuit pinaagi sa paglubong, 79-65 sa second  conference sa LABA President’s Cup 2015 basketball tournament niadtong Lunes didto sa Banilad Sports Center sa dakbayan sa Mandaue.

Sa maong kadaugan, ang Monterroyo ni playing coach Dr. Raul Monterroyo  temporaryo na karon nga nagsolo sa ikaduhang dapit sa standing sa ilang 4-1 win-loss record, samtang ang MS Motosuit ni Lou Ornopia adunay 2-3 nga baraha.

Sa gilauman, si Tawing Grafe mao gihapon ang mitimon sa Monterroyo ngadto sa kadaugan human miantog og 29 puntos. Si Rex Gonzaga mihirit og 15 puntos, samtang si Arnel Lepon midiga’g 11 puntos  alang sa Monterroyo nga milabaw og 20 puntos, 77-57 sa fourth quarter.

Ang nasugamak nga MS Motosuit gipangulohan gihapon ni Rechel Bamba, kinsa miratsada’g 23 puntos, gisundan ni Noel Dicdican sa iyang 17 puntos ug Ramil Estremos nga adunay 11 puntos.

Sa pasiunang duwa,  ang Lolypop-Rostata miiskor na sab og daog batok sa AC Troopers sa iskor nga 65-60.

Sa wala damha, ang torotoy nga si Ariel Ocier maoy nahimong topscorer sa kadaugan nga mikamada’g 25 puntos.

Laing tulo niya ka teammates ang mihimo sab og double figures. Si Renzen mitimbre’g 12 puntos, si Clark Monsanto miabuno’g 11 puntos ug si Glen Rostata mitikdol og 10 puntos alang sa kadaugan.

Si Opong Englis maoy nangu sa AC Troopers nga mipabuto’g 15 puntos, samtang ang team owner nga si SPO4 Dondon Coloscos mipunting og 11 puntos alang sa iyang koponan nga nakatilaw sa ikatulo nilang pilde sud sa lima ka duwa.

Ang mga duwa gidumala ni league commissioner Geryl Bukiron inabagan ni Lloyd Chavez.

Puntos matag usa

Unang duwa:

ROSTATA (65) – Ocier 25, Renzen 12, Monsanto 11, Rostata 10, Catinoy 2, Dawal 2, Jacalan 2.

AC TROOPERS (60) – Englis 15, Coloscos 11, Jacalan 9, Cabahug 6, Cornejo 6, Migallen 4, Beldera 3, Balo 2, Yares 2, Heredia 2.

Ikaduhang duwa:

MONTERROYO (79) – Grafe 29, Gonzaga 15, Lepon 11, Bontilao 8, Ecot 7, Ramos 3, Baunsit 3, Pestaño 2.

MS MOTOSUIT (65) – Bamba 23, Dicdican 17, Estremos 11, Medillo 4, Mendoza 4, Suico 2, Mauro 2, Diaz 2.