UV, USC ilog karon sa 2-1 nga bentaha

CEBU, Philippines - Pag-angkon og 2-1 nga bentaha maoy tuyo sa   magkaribal nga University of the Visayas Green Lancers ug  University of  San Carlos Warriors  dihang   mag-abot na sab sila sa Game-3 sa ilang “best-of-five” championship series  sa   15th Cebu Schools Athletic Foundation, Inc. (CESAFI) basketball tournament karong adlawa diha sa Cebu Coliseum.

Ang duwa gitakda sa alas-6 sa gabii.

Ang Warriors maoy miangkon sa Game-1 sa iskor nga 76-70, apan mibawos ang Lancers sa Game-2, 70-63 aron matabla ang series, 1-1.

Sa maong mga duwa, makita kun unsa kasikit ug unsa ka patas ang winning margins sa duha ka teams.

Kun championship experience ang hisgutan,  pabor ang Lancers, apan   ang  Warriors kun kahinumduman aduna na’y 3-2 sa ilang head-to-head match-up. Nagpasabot kini nga wala gihapo’y makatagna kun  ang kasinatian ba sa Lancers maoy mopatigbabaw.

Human mapilde sa Game-2, seguradong manimawos sab karon ang mga shooters sa Warriors nga naglakip  nilang Nico Magat, Victor Rabat ug Ian Ortega ug kinahanglan na sab nga motabang pagkontrolar sa rebound si Charles Pepito.

Ang mas dakung pahat sa opensa sa Warriors adto maggikan nilang Ian Jefferson Tagapan ug sa  import niining si Shooster Olago nga kanunay maoy mahimong 1-2 punch sa ilang team.

Wala gihapon makakita og solusyon ang  Warriors kun  unsaon nila pagpugong ang point guard sa Lancers nga si June Kent Manzo, kinsa nahimong best player atol sa Game-2 human moiskor og 20 puntos.

Daku sab og natabang sa opensa ug depensa ang import sa Lancers si Steve Cedrick Akomo.

Ang Lancers makasalig sab sa uban nilang tirador sama nilang Francisco Arong, Alfred Codilla, Leonard Santillan, Alwyn Aguirre ug Arvie Cabanero. (BANAT NEWS)