Ladon naka-bronze sa World Boxing Championship
CEBU, Philippines – Bronseng medalya lamang maoy nahatag ni Rogen Ladon alang sa Pilipinas human siya mapilde ni Russian Vasilii Egorov sa ilang sangka sa semifinals sa AIBA World Boxing Championships sa miaging adlaw didto sa Doha, Qatar.
Bisan og nagpunay kini’g pangupot aron makalikay sa gihimong pag-ataki ni Ladon, si Egorov nakamaneho pagposte og kadaugan pinaagi sa ‘unanimous decision’. Ang tulo ka mga judges mipabor kaniya sa parehong iskor nga 29-28.
Bisan pa man sa iyang kapakyasan, mapasigarbuhon gihapon ang 21-anyos nga si Ladon kay iya man gihatagan ang Pilipinas sa labing una niining medalya sud sa walo ka tuig sa maong torneyo nga ipahigayon kausa lamang sud sa duha ka tuig. Katapusan nakasignit og medalya ang Pilipinas kortesiya sa kanhi Olympian nga si Harry Tañamor, kinsa naka-silver niadtong tuig 2007.
Si Ladon, sa Bago City, Negros Occidental, duna pa sa’y duha ka tsansa nga makaangkon og luna sa 2016 Rio de Janiero Olympic Games pinaagi sa Asian-level qualifying tournament unya sa Marso o Abril 2016 ug ingon man sa laing worldwide Olympic qualifying tournament sa sunod tuig gihapon. (BANAT NEWS)
- Latest
