USC sa Game 1

CEBU, Philippines – Nag-igo sa iyang outside shooting si Ian Jefferson Tagapan apan ang University of San Carlos Warriors didto modangop sa ilang import nga si Shooster Olago sa opensa ug depensa aron mokulit og 76-70 nga kadaogan batok sa University of the Visayas Green Lancers kagabii sa Game 1 sa ilang best-of-five championship series sa seniors division  sa 15th season sa Cebu Schools Athletic Foundation, Inc. (CESAFI) basketball tournament didto sa Cebu Coliseum.

Ang Game 2 himoon ugma sa alas 6 sa hapon.

Tataw nga gikapoy na si Olago kinsa naghupot og upat ka fouls tungod kay upat lang sa iyang napulo ka free throws ang iyang napasulod sa kataposang usa ka minuto  sa duwa apan siya lang gihapon maoy nangu sa opensa sa Warriors sa iyang 19 puntos, 12 ka rebounds, duha ka steals ug duha ka blocks nga iyang nahimo sa unang ball possession sa Lancers.

Si Tagapan kinsa mihimo'g 3 for 5 sa iyang three-point field goal, maoy nahimong best player of the game human siya moamot og 15 puntos samtang may 10 puntos ang power forward nga si Charles Pepito.

Ang Warriors naglabaw na unta og 17 puntos, 72-55 sa kataposang 3:31 sa fourth quarter apan mihimo'g 10-0 run ang Lancers sulod lang sa pipila ka segundos aron mosikit sa makadiyot, 65-72.

Misamot pa gyud pagsikit ang Lancers human sa split charities ni Olago, 73-67 may 32.7 ang oras ug naka-iskor ang import sa Lancers nga si Steve Cedrick Akomo, 69-73 sa nahibiling 15.8 segundos.

Si Akomo mihimo'g 16 puntos ug may 11 ka rebounds ug didto na sa uwahing bahin siya nakapatas og diyotay kang Olago ug naghupot sab siya'g upat ka fouls sama kang Olago.

Si Manzo kinsa duna sa'y upat ka fouls maoy nangu sa Lancers sa iyang 23 puntos. Didto kalit mikunhod ang espiritu sa Lancers dihang pareho nang may upat ka fouls silang Akomo ug Manzo nga maoy hinungdan nga limitado na ang ilang lihok.

Sa sayo pa, midaog ang University of San Jose Recoletos Jaguars batok sa Southwestern University Cobras alang sa sangka sa ikatulong pwesto, 77-74 diin maoy nahimong best player si Ralph Dinolan kinsa mibahug og 20 puntos uban kang Kevin Villafranca apan may siyam ka rebounds si Dinolan.

Si Jan Michael Auditor miposa og 19 puntos alang sa Cobras ug midugang si Mark Jayven Tallo og 16 puntos.

Puntos matag usa:

USJR (Srs.) 77 – Dinolan 20, Villafranca 20, Mantilla 14, Gastador 10, Labares 8, Senining 3, Bayhonan 2, Resma 1.

SWU (Srs.) 74 – Auditor 19, Tallo 16, Bautista 14, Racho 11, Holper 6, Luz 5, Pardo 3.

Second Game:

USC (Srs.) 76 – Olago 19, Tagapan 15, Pepito 10, Rabat 9, Ortega 8, Magat 5, McAloney 4, Laguyo 2, Suarez 2.

UV (Srs.) 70 –  Manzo 23, Akomo 16, Segumpan 8,Arong 6, Mendoza 4, Suerte 4, Cabanero 3, Napao 2, Balabag 2. (BANAT NEWS)