Monteroyo, Lakers 3-0 na

CEBU, Philippines - Mihimo og dakung kasikas ang Team Monteroyo dihang nakabangon kini gikan sa dakung lubong aron moiskor og daog batok sa Lolypop-Rostata, 71-68 sa second conference sa LABA President’s Cup 2015 basketball tournament niadtong Lunes didto sa Barangay Banilad Sports Center, Mandaue City.

Ang Team Monteroyo ni playing coach Dr. Raul Monteroyo gilubong og tagaliog  sa halftime, 18-46.  Bisan pa niini, ang Team Monteroyo wala magpakawala sa paglaum ug padayong  nakigbisog sa giya nilang Tawing Grafe, Albert Ramos ug Rex Gonzaga aron mailog ang labaw. Si Grafe mihimo’g double-double pinaagi sa iyang 28 puntos ug 13 ka rebounds, si Ramos mitikdol og 19 puntos, samtang si Gonzaga mitimang og 17 puntos alang sa Team Monteroyo nga madasigon kaayong nakaduwa tungod sa presensiya sa LABA Legends nga sila si Cesar Lee, Rudy Candelada ug Dennis Patindol.

Diha na nakalabaw ang Monteroyo sa third quarter, 51-50 sa free throws ni Ramos ug sukad niadto sila na ang nikontrolar sa  duwa.

Sila si Rene Monsanto ug Ronilo Dawal nga maoy miduslit sa kainit sa Lolypop-Rostata sa first half nagkumbinar og 47 puntos.

Sa laing duwa, ang Lakers mihipos sab sa ikatulo nilang daog batok sa Avengers, 76-61 sa pagpangulo ni Raymundo Carvajal, kinsa mikandos og  17 puntos. Sila si Aldrin Gonzaga ug Marcial Marturillas mitampo’g 15 puntos matag usa.

Tulo sab ka players sa Avengers ni Arnold Pestaño ang mikulit og double digits sa pagpangulo ni Merot Ygoña  sa iyang 20 puntos.

Ang Monteroyo ug Lakers  nagbitbit  na karon og 3-0 nga baraha ning maong torneyo nga gipasiugdahan sa LABA ubos sa liderato ni councilor Gilbert Sebandal. Ang mga duwa gidumala ni league commissioner Geryl Bukiron inabagan ni Lloyd Chavez.

Puntos matag usa

Unang duwa:

LAKERS (76) – Carvajal 17, Gonzaga 15, Marturillas 15, Quiñahan 8, Oljol 7, Inocando 4,  Jacalan 4, Alburo 3, Pestaño 2, Gastardo 1.

AVENGERS (61) – Ygoña 20, Catinoy 11, Batuan 10, Pestaño 6, Rusiana 6, Tantuan 4, Auman 4.

Ikaduhang duwa:

MONTEROYO (71) – Grafe 28, Ramos 19, Gonzaga 17, Monteroyo 6, Pestaño 5, Hatamosa 2, Ecot 2, Bontilao 1, Cabucos 1.

ROSTATA (68) – Monsanto 31, Dawal 16, Acusar 6, Catinoy 5, Enriquez 4, Ocier 2, Rostata 2, Lamparas 2. (BANAT NEWS)