Pagtulon-an sa mansiyon ni Pacman

Human manihapon sa usa ka Chinese restaurant sa SM City-GenSan, milahos ko ug si Dong Secuya, ang gitamod nakong higala ug utok sa philboxing.com, ug pipila namo ka mga kaubanan paingon sa mansiyon ni Manny Pacquiao. Wala namo palabya ang kahigayonan nga motimbaya ni Pacquiao human ko masayod nga anaa ra siya sa iyang tugkaran  sa giilang ‘Tuna Capital’ sa nasud.

Pag-abot pa lang namo sa ganghaan sa iyang panimay maoy misugat namo ang bagang panon sa mga tawo bisan og lawom na ang kagabhion. Ang uban kanila dunay lehitimong katuyoan, samtang ang uban mura’g ba og sa nagpaabot nga wa’y kasiguroan ang ilang tinguha nga makasud o di ba kaha masigpatan man lamang si Pacman.

Kay lagi nakaeskedyul man ang among pagbisita, salamat sa maabi-abihon nga tuong kamot ni Pacman nga si Aquilles Zonio, dali ming gipasud sa pultahan nga gawas namungingi og security cameras, duna sa’y mga guwardiya nga hugot kanunay nagkupot sa ilang mga armalite nga maura’g anaa sila sa giyera.

Sa dihang nakasud nami sa mismong lawak diin siya tigdawatan sa iyang mga bisita, igo lang nga miwara sa iyang kamot si Pacquiao pagkakita namo gumikan kay duna pa man siya’y seryoso kaayong gikaestorya niadtong higayona. Kini usa ka babaye nga mainiton kaayong misaysay kang Pacman kabahin sa dakung kausaban sa iyang kinabuhi human makaplagi ang bag-o niyang tinuohan subay sa gisabwag sa giidolo natong boksingero. Sukad daw nga iyang gitugyan ang tanan ngadto sa Labaw’ng Makagagahum, nahatagan og bag-ong kahulogan ang iyang pagpakabuhi ning kalibotana.

Apan sa kalit lang miisa ang akong kilay dungan sa pag-ulbo sa akong kaspa sa dihang mipaambit ang maong babaye og sugilanon kun giunsa niya pagbitad ang iyang pamilya sa bag-ong kaplag niyang pagtuo. Iya man daw nga gisukmatan ang iyang inahan nga sa dihang adunay nasakit sa iyang pamilya, nakatabang ba daw ang iyang gisangpitan og tabang nga mga ‘niño’ ug ‘birhen’ aron maayo ang gipamati sa ilang kabanay. Siya miderikta og tubag sa iyang sukmat sa pag-ingon nga wala makatabang ang mga imahen nga giyukboan sa iyang inahan kay bugtong si Hesukristo lamang ang angayan nato sangpitan og panabang.

Sa hilom misurok ang akong dugo kay niadtong tungora akong gibati nga maura ba og gitulisok sa maong babaye ang labing simbolo ug labing lig-on nga pundasyon sa pagtuo nga akong namat-an isip Katoliko Romano. Misantop sa akong huna-huna nga kun ang maong babaye tiunay sa iyang pagyukbo sa Labaw’ng Makagagahum, dili na niya kinahanglan nga manaut pa og laing tinuohan.

Apan diha-diha nahupay ang akong dughan ug nalamdagan ang akong galamhan kay human sa litanya sa maong babaye, nga gibati gani og tumang kauwaw sa dihang nasayod nga daghan diay ming naminaw niya, si Pacquiao man mismo ang mibaraw kaniya.

Sa hinay apan hait nga pamaagi, gisermonan ni Pacquiao ang maong babaye nga kun ang usa ka tawo tiunay nga nagatuo ug nagmahal sa Ginoo, dili na kinahanglan pa niini nga mangataki og ubang relihiyon ug motamak sa pagtuo sa uban.  Alang ni Pacquiao, dili relihiyon ang makasalbar kanato kun dili ang personal natong relasyon sa Ginoo ug sa katim-os sa atong kasing-kasing pagdawat kaniya isip atong manluluwas.

Salamat sa maong bulawanong pagtulon-an nga  akong nakat-onan sa mansiyon ni Pacman.

* * *

Kun dunay mga komentaryo o reaksiyon mahimong mo-email sa [email protected]