Stella sa team Joeric mi-knockout ni Abanez

CEBU, Philippines - Gipatikangkang ni  Jeffrey  Stella sa Team Joeric/Mike Boxing ang kontra niini nga si Jamebert Abanez atol sa sangka nila sa “Champion of the Future 2”  fight card  niadtong Domingo sa gabii didto sa  Cebu Provincial Detention and Rehabilitation Center sa Barangay Kalunasan, ning siyudad sa Sugbo.

Ang  pagtuman   ni Stella sa  gameplan sa iyang coach nga si Edcel Tuñacao  daku og natabang kaniya aron iyang mapakamang si  Abanez pinaagi sa makabungog nga right punch sa oras nga 1:29 sa unang hugna.

Ang pambato sa Joeric/Mike Boxing nga si Stella,   bag-o lang sab nga nag-debut niadtong Abril diin miresulta sa ‘draw’ ang iyang sangka ubos sa bantamweight division.

Ang maong daog  maoy misumpay sa  laing knockout nga kadaugan ni Stella niadtong Agosto 16 didto sa Maasin City.

Si Stella nagbitbit na karon og 2-0 win-loss record ug usa ka draw.

Gikalipay og maayo ni Joeric Calisang, ang  Team Joeric/Mike Boxing’s patron sa gipakitang performance ni Stella ug sa uban pa niyang mga batos lakip na ang mga amateur boxers.

Sa laing bahin, si flyweight campaigner Rimon Rama mikulit og ‘unanimous  decision’ nga kadaugan batok ni Elbert Donato.

Si Rama nadasig og maayo sa maong away human niya matumba sa third si Renato gamit ang  iyang left jab.

Si Rama sa Team Joeric  wala sab makatilaw og pilde sa duha ka away sa iyang debut fight.

Sa pikas  bahin, si Mark Rotilles, miiskor  sab og ‘unanimous decision’ nga kadaugan sa iyang debut fight batok ni Junmar Peregrino sa super flyweight division.

Midaog sab ang laing amateur boxers sa Team Joeric nga sila si Lenmar Prescillas ug Luis Espina   batok sa CPDRC fighters nga sila si George Salugaol ug Marvin Narte. (BANAT NEWS)