Kenyans hawod sa Ruby Jubilee Run
CEBU, Philippines – Gidominar sa mga Kenyan runners ang “Ruby Jubilee Run” sa Saint Paul Learning Center kagahapon didto sa Sumilon road sa Cebu Business Park.
Si Abraham Kilima naghari sa 10K men’s sa iyang 34:13, gisundan sa iyang kababayan nga si Douglas Mwiti (34:20) ug sa Sugbuanong si Ian Ruefela (36:62).
Sa women’s division, si Lovely Fe Andrin maoy milangkat sa 10K women’s title human mioras og 46:15. Sila si Sara Lee Cuizon (46:28) ug Cez Atup (1:24:15) maoy second ug third placers.
Wala usab palupig ang Kenyan nga si Joseph Murari, kinsa mao sab ang nanghawod sa 5K men’s sa oras nga 16:20. Sila si Michael Largo (16:53) ug John Manos (17:03) miokupar sa ikaduha ug ikatulong dapit.
Si Mary Joy Loberanis maoy unang milabang sa finish line sa 5K women’s sa oras nga 19:00, samtang ang managsuong Yu nga sila si Catherine (22:54) ug Angeline (23:40) miangkon sa mosunod nga duha ka luna. (BANAT NEWS)
- Latest
