UAAP Cheerdance competition 3-peat pakay ng NU Pep Squad

Laro Ngayon

(Mall of Asia Arena, Pasay City)

2 p.m.  UAAP Cheerdance

MANILA, Philippines - Sisikapin ng National University Pep Squad na mailinya ang sarili bilang ikatlong paaralan na naka-3-peat sa paglarga ng 78th UAAP cheerdance competition ngayon sa Mall of Asia Arena sa Pasay City.

Magsisimula ito sa ganap na alas-2 ng hapon at inaasahang magpapakita ng bagong pagtatanghal ang NU para mapanatili ang titulong pinanalunan mula Season 76.

Ang UST Salinggawi Dance Troupe at host UP Pep Squad ang mga kopo­nan nakatatlong sunod na titulo mula nang sinimulan ito noong 1994.

May pinakamaraming tig-walong cheerdance titles ang UST at UP at tiyak na pareho silang magsusumikap para makatikim uli ng titulo sa nasabing kompetisyon.

Binibigyan ng puntos ng mga hurado ang pagsayaw bukod pa sa pagsasagawa ng tumbling, stunts, toss at pyramids.

Magkakaroon ang UP ng oportunidad na bigyan ng pressure ang ibang katunggali dahil sila ang u­nang magtatanghal. Kasunod ang La Salle Animo Squad, Ateneo Blue Babble Battalion, NU, UE Pep Squad, Adamson Pep Squad, FEU at UST.

Bukod sa NU ay magpupursigi rin ang FEU Tamaraws para manatili sa kanilang bakuran ang kampeonato sa group stunts category sa pangalawang sunod na taon.