Jaguars mitagak sa Cobras

CEBU, Philippines - Mipatuasik og 24 puntos si Kevin Villafranca, samtang   si Ralph Dinolan mitusak og  22 puntos aron pangulohan ang  University of San Jose Recoletos Jaguars ngadto sa 81-75 nga kadaugan ug  ingon man sa pagpalagpot sa  defending champion Southwestern University Cobras sa  semifinals sa 15th Cebu Schools Athletic Foundation, Inc. (CESAFI)  kagabii didto sa Cebu Coliseum.

Ning pagsuwat kagabii,  padayon pang nagduwa ang topseed University of the Visayas Green Lancers ug ang second seeded   University of San Carlos Warriors diin ang modaog  maoy  makaangkon sa unang luna sa finals.

Miduwa ang napiang nga si Jesse Bautista alang sa Cobras, apan tungod kay kuwang sila’g players halos silang  tanan na-foul trouble sa maong duwa.  Wala sab makaduwa si  Jan Michael Auditor, kinsa  miserbisyo sa iyang one-game suspension.

Si Dinolan usa sa daku’g gikatabang sa maong kadaugan dihang siya maoy unang mihimo sa kuwatro puntos sa duwa aron hatagan ang Jaguars og 63-58 nga abante. Bisan og kanunay mosikit ang Cobras, apan nakontrolar lang gihapon sa Jaguars ang fourth period dihang nagsugod na sab og pamuntos silang  Villafranca, Jan Miguel Gastador ug Jaybie Mantilla.

Si Villafranca maoy nahimong best player of the  game ug ang iyang presensiya sa ilawom maoy usa sa mga hinungdan nganong kanunay makakubit og foul ang Jaguars. Gawas pa niana, si Villafranca mihimo sab og 12 ka rebounds ug duha ka blocks.

Si Gastador, kinsa mihimo sab og mga krusyal kaayong puntos, maoy ikatulong Jaguars nga nakahimo’g double figures sa iyang 19 puntos.

Ang Cobras kinsa maoy naglabaw sulod sa unang duha ka kuwarter  gipangulohan nilang Bautista ug Mark Jayven Tallo nga  parehong miantog og 19 puntos, sila si Anton Pardo ug Jovanie Luz mihipos sab og 13 puntos matag usa.   (BANAT PALARO)