Registration sa Ironman AsPac buksan karon

CEBU, Philippines - Buksan na karong adlawa ang rehistrasyon sa makasaysayanong Cobra Energy Drink Ironman 70.3 Asia-Pacific Championship nga anhi  ipahigayon sa Sugbo sa bulan sa Agosto sunod tuig.

Alang sa gustong moapil sa maong kulbahinam nga karera, moabot ngadto sa 2,900 ka mga slots ang gitagana sa mga organizers nga makuha lamang gikan sa alas-6:30 hangtod sa alas-8:30 sa buntag diha sa Cebu Provincial Capitol.

Sama sa nangaging Cobra Ironman event, seguradong kuninitan ang mga slots ug gipaabot nga mahurot dayon kini sud sa duha ka oras. Kini gumikan kay ang Cobra Ironman dinhi sa atong dapit usa man sa mga gilantaw nga kompetisyon matag tuig sa mga tadhan ug banggiitan nga triathletes gikan sa nagkadaiyang dapit sa kalibotan.

Gani gumikan sa malampuson nga pagpadagan sa Sugbo sa Cobra Ironman 70.3 Philippines sa milabay nga upat ka tuig, mao kini ang napili nga mo-host sa labing unang Asia Pacific Championships dinhi sa rehiyon.

“Cebu also hosted the successful Ironman 70.3 Philippines triathlon for the past five years – and will provide our athletes with a beautiful and challenging championship course,” matud pa ni Geoff Meyer,  ang CEO sa Ironman Asia-Pacific. Kadtong moadto sa Kapitolyo aron personal nga magparehistro makadawat og Cobra Energy Drink IM 70.3 AsPac t-shirt ug ingon man libreng pamahaw kortesiya sa Alaska Milk. (BANAT NEWS)