Brawl at the mall sa General Santos City Demecillo daog vs. Basadre

GENERAL SANTOS CITY, Philippines – Gipamatud-an ni Kenny Demecillo sa Omega Boxing Gym sa Sugbu nga dili tsamba ang miagi niyang daog batok sa usa sa labing sanag nga bitoon sa Sanman Stable nga si Daryl “Flash” Basadre.

Kini human si Demecillo nakalingkawas human matumba sa ikaduhang hugna dayon na ngadto sa pagpatukay-ang ni Basadre sa ikawalong hugna aron pagsakmit sa World Boxing Federation (WBF) Asia-Pacific bantamweight title sa main event sa "Brawl at the Mall:Revenge or Revalidation" boxing event nga gidugokan og mga tawo niadtong Sabado sa gabii sa Gaisano Mall of Gensan Atrium dinhi.

Si Basadre, nga gipilde ni Demecillo pinaagi sa kontrobersiyal nga knockout sa ikaduhang hugna sa una  nilang engkuwentro tulo ka bulan ang milabay, maorag nagbaktas sa saktong dalan aron mapanimawos human iyang gitumba si Demecillo ginamit ang makusog nga right uppercut sa ikaduhang hugna.

Apan si Demecillo yano kaayong nakabarog ug nakamaneho pa gani kini pakigsinukliay og mahait nga kumo ngadto ni Basadre dayong human  sa maong hugna nga gikalingaw kaayo sa mga manan-away.

Human maka-rekober, nindot na kaayo ang giyagyag nga abilidad ni Demecillo ilabi na sa ikaupat nga hugna diin iyang gipauwanan si Basadre og body shots sa wala pa kini gipabarag ginamit ang mahait nga walang suntok.

Ang labing nindot nga labok ni Demecillo nahitabo sa ikapitong hugna human siya milandig og right straight nga klaro kaayong nakalipong ni Basadre nga niadtong higayona nagsige na lang og barog samtang gibayo siya og nagbagang kinumo sa Sugbuanong boksidor.

Nakalahutay pa si Basadre sa maong hugna apan klaro na kaayong nahutdan na siya og lana ug wala na siya'y ikabuga pa sa maong away. Suwerti na lang kaayo niadtong tungora kay nasalbar siya sa bagting sa kampana.

Tuod man pagsugod sa ikawalong hugna, si Demecillo mi-asdang gilayon sa iyang kontra dayong labay og kombinasyon nga nakapakamang ni Basadre sa hingpit. Hapit mokolapso si Basadre apan maayo na lang kay dali siyang natabang sa mga paramedics nga midala dayon kaniya ngadto sa hospital. Anaa na karon sa maayong kahimtang si Basadre.

"Lig-on pud akoang kontra kusog pud ug nasakitan pud ko sa iyang mga tirada," matud pa ni Demecillo. "Human nako siya na-igo sa ikapitong hugna nasurprisa ko nga wala giundang sa reperi ang away apan klaro nga lipong na kaayo siya ug didto kompiyansa na kaayo ko nga ako siyang matumba," matud pa ni Demecillo, nga nagbitbit na karon og 11-3-1 record. (BANAT NEWS)