AC Troopers, Aunicaj nakaipsot sa ilang kontra

CEBU, Philippines - Nakaipsot ang AC Troopers ug ang Aunicaj sa kulbahinam nilang duwa batok sa ilang tagsa-tagsa ka mga kaatbang sa Second Conference sa LABA President’s Cup 2015 basketball tournament niadtong Biyernes didto sa Barangay Banilad Sports Center, Mandaue City.

Ang AC Troopers ubos sa liderato ni SPO4 Dondon Coloscos midaog batok sa defending champion Mandaue Lolypop (kanhi LB Water Refilling Station) sa iskor nga 67-65.

Si Coloscos, kinsa mikadlit og 10 puntos sa tibuok duwa, nahimong bida sa AC Troopers dihang iyang napalabaw ang koponan sa labing unang higayon sa fourth quarter, 65-63 sa nahabiling 45 segundos sa duwa ug ang iyang usa ka free throw sa himalatyong oras maoy mihingpit sa ilang kadaugan.

Apan si Pedot Dakay maoy nangu sa AC Troopers nga mipabuto’g 16 puntos, gisundan ni Jerry Jacalan sa iyang 14 puntos ug Opong Englis nga adunay 12 puntos.

Upat sab ka players sa Lolypop ang miiskor og double figures pinangulohan nilang Canjo Echavez ug Madrid nga parehong mikadlit og 13 puntos. Sila si Ray Niez ug  Ebyong Ouano mikamada’g 12 ug 10 puntos.

Sa laing bahin, ang Aunicaj miposte og 2-0 human makaeskapo batok sa Lesjorcinran, 66-64.

Gibiyaan og nuybe puntos ang Aunicaj, 10-19 sa sayong bahin sa second period, apan ang three point artist nga si Geryl Bukiron mitusak og tulo ka sunod-sunod nga triples aron matipakan ang labaw sa Lesjorcinran, 19-23 sa tunga-tungang bahin sa maong kuwarter.

Ang Lesjorcinran maoy pirmeng naglabaw gikan sa pagsugod, apan nausab ang dagan sa duwa sa third quarter dihang nailog  sa Aunicaj ang bentaha ug  nilabaw pa gani og siyete puntos, 61-54 sa nahabiling 2:30 sa final period.

Nahimong kulbahinam ang aksiyon dihang kalit nga misikit ang Lisjorcinran gikan sa otso puntos nga biya, 64-65 sa nahabiling 36 segundos human makompleto ang tulo ka free throws ni Al Yamomo.

Gihatagan unta og duha ka higayon ang Lesjorcinran aron maka-overtime dihang dos puntos lang ang labaw sa Aunicaj ni playing coach Tony Alcover, 66-64, apan wala nila kapahimusli ang kahigayonan kay mikagar ang itsa nilang Lloyd Chavez  ug Adie Cinco.

Si Dodoy Rizane maoy nangu sa Aunicaj sa iyang 15 puntos, gisundan ni Noel Puerto nga adunay 14 puntos, samtang si Bukiron mitikdol og 10 puntos.

Sila lang si Richard Jordan ug Yamomo ang naka-double digits alang sa  Lesjorcinran sa ilang 16 ug 11 puntos.

Sa pasiunang duwa, ang Monteroyo yano kaayong mikulit og daog human nila gilubong ang Team Luigi, 78-48.

Gipangulohan ni Tawing Grafe ang Monteroyo sa iyang 27 puntos, samtang si Aldrin Gonzaga miabuno’g 19 puntos alang sa team ni Dr. Raul Monteroyo.

Ang Luigi gipangulohan ni Gabayan nga mikamada’g 18 puntos, gisundan ni Arnel Asis nga adunay 11 puntos.

Ang mga liga nga ubos sa pagtugot sa presidente sa Los Amigos Basketball Association nga si konsehal Gilbert Sebandal, gidumala ni league commissioner Geryl Bukiron, inabagan nilang Lloyd Chavez ug Ramil Baclay ug ingon man ni Allan Recla ug nilang Changchang Tejero, Norman Tisoy, Eduard Escorial ug Kenneth Tagalog. (BANAT NEWS)

 PUNTOS MATAG USA

Unang duwa:

MONTEROYO (78) – Grafe 27, Gonzaga 19, Ramos 9, Bontilao 6, Monteroyo 5, Hatamosa 4,  Baunsit 4, Cabucos 2, Lipon 2, Pestaño 2.

LUIGI (48) – Gabayan 18, Asis 11, Encorporado 5, Pacquiao 4, Monsanto 4, Rogado 2, Mahilum 2, Buliag 2. 

Ikaduhang duwa:

AC TROOPERS (67) – Dakay 16, Je. Jacalan 14, Englis 12, Coloscos 10, Beldera 8, Balo 3, Yares 2, Cornejo 2.

LOLYPOP (65) – Echavez 13, Madrid 13, Niez 12, Ouano 10, Joe 8, Yatan 3, Caballero 2, Malazarte 2, Povadora 2.

Ikatulong duwa:

AUNICAJ (66) – Rizane 15, Puerto 14, Bukiron 10, Gelbolingo 5, Lagaras 4, Magale 4, Alcover 4, Echavez 3, Colanse 2, Milana 2, Rempojo 2, Villalon 1.

LESJORCINRAN (64) – Jordan 16, Yamomo 11, Lesin 8, Cinco 6, Chavez 6, Pestaño 5, Limosnero 4, Lara 4, Evangelista 2.