Kinsa kaha masulod sa semifinals?
CEBU, Philippines – Hisayran na karong adlawa kun kinsa ang makakuha sa katapusan ug ikaupat nga luna sa semifinals sa dihang ang University of San Jose- Recoletos Jaguars ug ang University of Cebu Webmasters mag-abot sa katapusang adlaw sa double round sa elimination sa seniors division sa 15th season sa Athletic Foundation, Inc. (CESAFI) diha sa Cebu Coliseum.
Ang Jaguars nga nagtinguha mosakmit sa katapusang lingkoranan sa semis moharong sa Webmasters sa pasiunang duwa sa alas-2 sa hapon.
Kinahanglan nga modaog ang Jaguars aron maoy moabante sa semis nga walay komplikasyon. Kay kun mapilde, ang Jaguars makamugna og triple-tie uban sa Webmasters ug Cebu Institute of Technology-University Wildcats nga magbitbit og 5-7 nga baraha.
Kun mahitabo, ang Wildcats maoy adunay dakung purohan nga moabante sa semifinal round. Kini tungod kay ang UC nidaog pinaagi sa forfeiture batok sa USJ-R atol sa ilang unang sangka, samtang ang Wildcats midaog og kaduha batok sa Webmasters niini nga season.
Ang Jaguars magsalig nilang Kevin Villafranca, Ralph Dinolan, Mark Labares, Nelvin Navarra, Juan Miguel Gastador ug Jaybie Mantilla, samtang ang Webmasters adto mosalig nilang Garciano Puerto, Melvin Butohan, Joseph Mayol, Earl Montilla ug Justin Dacalos.
Sa main game ang University of the Visayas Green Lancers laraw nga mosakmit sa unang dapit sa standing dihang ilang sangkaon ang Southwestern University Cobras sa alas-3:30 sa hapon,
Ang Green Lancers, Cobras ug ang University of San Carlos Warriors daan nang mipasilong sa semifinals. (BANAT NEWS)
- Latest
