AMBL batok R.A. essentials sa AS-ES B.A.R. finals
CEBU, Philippines - Ang AMBL/Alexa Const ug ang R.A. Essentials/Shaweh maoy mag-abot sa finals human midaog batok sa tagsa-tagsa nilang kaatbang sa crossover semifinals sa As-Es B.A.R. Second Conference Fiesta Cup 2015 niadtong Lunes sa gabii didto sa Benjamin Solon Memorial Gym sa Cogon Ramos, Cebu City.
Unang milangkat sa lingkoranan sa finals ang AMBL/Alexa Const human nila gitagak ang San Mig Food Ave, 91-81, samtang yano sab kaayong nakuha sa R.A. Essentials/Shaweh ang katapusang luna sa finals pinaagi sa paglubong sa Boston Warriors, 105-89.
Gipangulohan ni Robert Abasolo ang AMBL/Alexa Const human mokulit og 18 puntos.
Sila si Erwin Ferrer ug Kit Arellano miabuno’g 13 ug 10 puntos matag usa alang sa AMBL/Alexa Const nga maoy midiktar sa duwa.
Si Dexter Estella mao sab ang nangu sa opensa sa San Mig Food Ave pinaagi sa iyang 16 puntos, gisundan ni Richard Molina nga adunay 12 puntos, samtang sila si Louie Galon, Art Arellano ug Mark Torres pulos mitimang og 10 puntos.
Sa laing bahin, lima ka players sa R.A. Essentials/Shaweh ang miiskor og double digits pinangulohan ni Frankie Lastimoso, kinsa miburak og 25 puntos.
Mipakita sab og maayong labok sila si Louie Tanggol ug Mico Llagas nga nagkumboya’g 29 puntos, samtang sila si Rocky Bacalso ug Reggie Licanda mitimbre’g 10 puntos matag usa.
Ang natagak nga Boston Warriors gipangulohan ni Jojo Talas sa iyang 26 puntos, gisundan ni Julius Gastador nga adunay 24 puntos.
Ang AMBL/R.A. Essentials titular showdown giduwa kagabii diha gihapon sa Benjamin Solon Memorial gym. (BANAT PALARO)
- Latest
