Ms Motosuit, Lakers, Avengers daog dayon

CEBU, Philippines - Si Marlon Mendoza mipasud og usa sa duha ka free throws sa himalatyong segundos sa final period nga igo na kaayo sa pagpadaog sa MS Motosuit sa kulbahinam nila nga duwa batok sa Lesjorcinran, 53-51  sa pagsugod sa 2nd Conference sa Los Amigos Basketball Association (LABA) President’s Cup 2015 niadtong Lunes sa gabii didto sa Barangay Banilad Sports Center, Mandaue City.

Gawas pa niana, si Mendoza mihimo sab og crucial steals aron pugngan ang duwa nga mosangpot sa overtime.

Si Mendoza igo lang miiskor og nuybe puntos, apan ang iyang mabayanihong lihok nakaluwas sa MS Motosuit  gikan sa kaalautan.

Ang bigman nga si Rechel Bamba  miratsada’g 17 puntos aron pangulohan ang MS Motosuit ni playing coach Lou Ornopia.

Ang Lesjorcinran may purohan unta nga maka-overtime, dihang labaw lang og dos puntos ang MS Motosuit, 51-51, apan si Mendoza mikawat sa bola gikan sa mga kamot ni Barak Recto nga padulong molusot.

Sila si Al Yamomo ug Richard Jordan parehong mitikdol og 11 puntos, samtang si Recto adunay 10 puntos alang sa Lesjorcinran.

Sa laing aksiyon, ang Lakers gisubhan sab og daog dihang ilang gilumsan ang Mandaue-Lolypop, 69-60.

Ang Lakers mao sab ang midiktar sa duwa, apan nahulga sila dihang natipakan ang ilang 15 puntos nga labaw ngadto na lang sa singko puntos, 45-50 sa third period.

Hinay-hinay sab hinuon miburot ang labaw sa Lakers dihang misalida ang ilang playmaker nga si William Oljol nga nakatabang pagguba sa depensa sa Mandaue-Lolypop.

Sila si Raymundo Carvajal ug Eboy Quiñahan nagkumbinar og 27 puntos aron pangulohan ang Lakers, samtang sila si Marcial Marturillas, Aldrin Gonzaga ug Oljol parehong miamot og 10 puntos.

Gipangulohan sab ni Clark Monsanto ang Mandaue Lolypop pinaagi sa iyang 18 puntos, gisundan ni Ronilo Dawal nga adunay 15 puntos ug Ariel Ocier ug  Glen Rostata sa ilang 12 ug 11 puntos.

Midaog sab ang Aunicaj  batok sa Avengers, 77-74 sa pagpangulo ni Pepito, kinsa miantog og 20 puntos. Si Dodoy Rizane ug Geryl Bukiron miabuno’g 15 ug 14 puntos matag usa.

Si Arnold Pestaño mao sab ang topscorer sa Avengers nga mikimada’g 19 puntos, samtang laing upat niya ka teammates ang miiskor sab og double figures.  

Ang liga nga gibendisyonan sa ilang presidente nga si councilor Gilbert Sebandal, gidumala ni league commissioner Geryl Bukiron inabagan ni Ramil Baclay ug Lloyd Chavez ug ingon man nilang Changchang Tejero, Abel Bacalso, Gener Estrera ug Kenneth Tagalog sa CEBRA.

Puntos matag usa

Unang duwa:

AUNICAJ (77) – Pepito 20, Rizane 15, Bukiron 14, Lagaras 8, Alcover 6, Colanse 6, Gelbolingo 3, Villalon 2, Rempojo 2.

AVENGERS (74) – Pestaño 19, Perez 14, Tantuan 12, Ygoña 10, Bathan 10, Auman 6, Cuizon 3, Cañete 3, Tupaz 2.

Ikaduhang duwa:

LAKERS (69) – Carvajal 14, Quiñahan 13, Marturillas 10, Oljol 10, Gonzaga 10, Costanilla 5, Alburo 3, Surban 2.

LOLYPOP (60) – Monsanto 18, Dawal 15, Ocier 12, Rostata 11, Lavador 2, Jacalan 2, Salego 1.

Ikatulong duwa:

MS MOTOSUIT (53) – Bamba 17, Mendoza 9, Arreglo 6, Estremos 6, Medillo 6, Suico 4, Obsequias 3, Diaz 2.

LESJORCINRAN (51) – Yamomo 11, Jordan 11, Recto 10, Evangelista 7, Lara 5, Chavez 4, Pestaño 2, Limosnero 2, Cinco 1. (BANAT NEWS)