Mabuhi ang CEPCA

Ang chess usa sa mga isport nga kitang mga Pinoy dunay kapasidad nga manghawod bisan sa mga internasyonal nga kompetisyon. Dili man gud kinahanglan og igong gitas-on ug kusog aron ang usa ka atleta molampos niining maong matang sa paugnat sa kusog. Kun hait lang ka’g utok, bansay mohan-ay og taktika ug makamao mobasa sa huna-huna sa imong kontra, daog na.

Kun sa talento ug abilidad maoy hisgutan, kitang mga Pinoy dili mabitin.  Gani mapasigarbuhon kita gumikan sa pipila ka rekord nga atong nakulit sa natad sa ahedres. Si Rudy Tan Carodoso maoy labing unang International Master ug si Eugene Torre maoy labing unang Grandmaster sa Asya . Samtang ang Pilipinas sab  maoy labing daghan og naapilan nga World Chess Olympiad sa tanang mga nasud ning maong kontinente.

Apan subo kaayong palandungon kay ang isport nga hayag kaayong makahatag kanato og garbo mao sab ang usa sa labing kuwang og suporta gikan sa atong kagamhanan. Timaan niana, ang mga nasud nga kanhi yano natong pildihon kun chess maoy hisgutan karon maglisud na kita og daog bisan gani dinhi na lang sa Southeast Asia.

Ang labing hayag nga ehemplo sa kakuwang sa atong gobiyerno og suporta sa mga chess players mao ang batan-ong Grandmaster nga si Wesley So. Tiaw mo na, gitalikdan ang atong bandila aron magsul-ot sa uniporme sa Amerika nga mao na karon ang iyang girepresentar. Komplikado ang sitwasyon ni So, apan bisan unsaon nato’g hagpat, adto ra gihapon mapunta sa kakuwang og igong suporta ang usa sa labing bug-at nga rason nganong nakahimo siya sa maong desisyon.

Dinhi sa Sugbo, ang atong mga players angayan nga mapasalamaton kay bisan ang chess dili duol sa luwag sa kaban sa lokal nga kagamhanan kay lagi prayoridad niini ang mas sikat nga mga isports, aktibo man ang pribadong indibidwal pag-abag sa mga kalihukan kabahin sa pagpalambo sa maong duwa.  Kun wa pa’y nagpakabana nga pribadong sektor, seguro gilangaw na og pinaabot ang atong mga chess  players  aron lamang makasalmot og dekalidad nga kompetisyon diin mabaid og maayo ang ilang abilidad.

Usa kanila si Boojie Lim, kansang suporta sa chess wa’y pagkahupas sud  sa kapin na sa duha ka dekada.  Gawas ni Lim, ato sab nga madayeg ang CEPCA (Cebu Executives and Professionals Chess Association) gumikan sa wa’y puas niining paghatag og kinabuhi sa chess sud sa pipila na ka mga katuigan.

Gawas sa binulan nilang kompetisyon, misamot pa kaaktibo ang CEPCA pagpahigayon og mga aktibidadis nga nakahatag og dugang kasikas sa chess dinhi sa Sugbo.Ubos sa pagtimon sa maabtik nilang presidente nga si Engr. Jerry Maratas, ubay-ubay na sab nga mga mahinungdanong kalihukan ang gipasiugdahan sa CEPCA, butang nga seguradong gikalipay sa kinabag-an nga disipolo sa maong duwa dinhi sa atong dapit.

Ang CEPCA mao sab ang utok nganong naapil na ang chess sa curriculum sa usa ka inilang pribadong tunghaan, ang Marie Ernestine School sa dakbayan sa Lapu-Lapu.

Duha pa ka adlaw ang milabay, ang CEPCA malampuson nga mipahigayon sa ilang Silver Anniversary Open Tournament didto sa SM City-Cebu. Gawas sa paghulma og mga torneyo, daghan pa ang nakahan-ay nga programa nga ilusad sa CEPCA sa umaabot nga mga bulan tipik sa kasaulogan sa ika-25 ka tuig nilang anibersayo. Ug sa espesyal nilang okasyon, akong ipaambit kanila ang mainiton nakong panagdait ug pagtimbaya. Isip usa ka pribadong institusyon nga nabuhi sa kaugalingon nilang pundo ug labaw sa tanan nagpakabana sa kawsa sa uban bisan og mokuot sa kaugalingon nilang bulsa nga wala gani magdahum og bawos sa nabisbisan nila og kaayohan, angayan kining panaminan sa uban. Dalaygon ug sulundon kaayo ang ilang gibuhat mao nang sa hilom makaingon ko nga mabuhi ang CEPCA!

Kun dunay mga komentaryo o reaksiyon mahimong mo-email sa [email protected]