Ganzon nanghawod sa CEPCA anniversary tourney

CEBU, Philippines – Si Rommel Ganzon dali nga nakabangon human matakilpo sa ikaunom nga hugna dayon na ngadto sa pagsakmit sa kampiyonato sa Cebu Executives and Professionals Chess Association (CEPCA) Silver Anniversary Open Tournament niadtong Domingo didto sa SM City-Cebu.

Human gipilde ni Edcel Montoya, si Ganzon kalmado kaayong namawi pinaagi sa pagpakyaw og daog sa nahabilin niyang tulo ka duwa nga iyang gitak-op pinaagi sa pagpakaging sa tadhang varsity player sa University of San Jose-Recoletos nga si Ramil Wadim.

Human sa maong 9-round Swiss system competition, si Ganzon ug si Felix Shaun Balbona parehong mikulit og 8.0 puntos, apan si Ganzon maoy mibira sa korona pinaagi sa tie-breaker gamit ang Bucholz system.

Gawas sa P10,000 nga ganti, si Ganzon nakadawat sab og digital chess clock kortesiya ni long-time chess patron Boojie Lim.

Si Balbona, nga mipakurat ni Mario Mangubat sa katapusang hugna, nakadawat og P7,000 sa pagpahiluna niini sa ikaduhang dapit, samtang si Montoya mibulsa og P5,000 sa pagsolo niini sa ikatulong puwesto dala ang 7.5 puntos.

Sila si FIDE Master Anthony Makinano ug Mangubat miangkon og P3,000 ug P2,000 human mikapyot sa ikaupat ug ikalimang dapit.

Mikulit sab og 7.0 puntos sila si NM Arnold Cadiz, Bryle Arellano, Jimmy Ty Jr. ug Voltaire Sevillano aron pagkompleto sa Top 9.

Sila si Wadim ug Fernandito Pialan nagsawo sa ika-10 ug ika-11 nga puwesto human mikulit og 6.5 puntos, samtang naapil sa Top 20 bitbit ang 6.0 puntos mao sila si Marc Balbona, Ronald Ganzon, Jeremy Pepito, Santiago Peque, Aldwin Daculan, Ross Yamyamin, Richard Natividad, Crisanto Tan Jr. ug Erwin Ababat.

Sila si Charry Jacobs, KC Morala ug Belinda Baguio nakadawat og espesyal nga premyo isip top 3 female players. Ingon sab ang natagamtaman nilang Arnold Cadiz, Jimmy Ty  Jr. ug Ross Yamyamin sa Cepcans A ug Gabby Misterio, Mario Bustillo ug Romy Pialan sa Cepcans B.

Si Jerish Velarde maoy miguwang top kiddie ug si Jun Kidlat maoy gipasidunggang top senior player.

Ang mga kadagkuan sa CEPCA nga gipangulohan sa ilang presidente nga si Engr. Jerry Maratas maoy mitunol sa mga tropeyo ug ganting salapi ngadto sa tanang mga mananaog. (BANAT NEWS)