ALA boys mobangon

CEBU, Philippines – Human mapakyas pagsakmit sa world title sa miagi nilang mga away, tulo ka ALA boxers  tuyong  mobangon ug mamawi sa  ika-34 nga edisyon sa  Pinoy Pride series sa Nobiyembre 28 didto sa Hoops Dome sa Barangay Gun-ob, Lapu-Lapu City.

Pagaulohan og “Back with a Vengeance”, sila si  Milan  ‘El Metodico’  Melindo, ‘King’ Arthur Villanueva ug Rocky ‘Road Warrior’ Fuentes tinguhang mobangon batok sa wala pa hinganli nga  mga Latinong boksidor atubangan sa Cebuano fans.

Gihamok pa sa iyang kontrobersiyal nga kapildihan sa mga kamot ni Mexican Javier Mendoza, si Melindo misaad nga mopakita pag-usab sa iyang katakus aron maangkon ang WBO international light flyweight title.

Si Melindo (32-2, 12KOs) giplanohan nga moaway unya sa WBO light flyweight title kun ibakante na kini sa iyang stablemate ug two-time world champion nga si Donnie Nietes, kinsa mosaka  unya og timbang.

“As we all know (Donnie) Nietes is planning to move up in weight and that is why we are grooming Milan to possibly fight for the belt when Nietes vacates it,” matud pa ni ALA Promotions President and CEO Michael Aldeguer atol sa press conference kagahapon didto sa St. Mark Hotel.

Si  Melindo naglaum nga  buligan na siya og suwerte human napilde pinaagi sa kontrobersiyal nga unanimous decision  ngadto sa Mehikanong  si Javier Mendoza sa ilang IBF light flyweight title fight niadtong Mayo 31 didto sa Mexico City.

Sikit kaayo ang  away, apan naundang kini sa sixth round human si Mendoza nakaangkon og gisi sa iyang mata mugna sa headbutt.  Ang tulo ka mga hurado  mihatag sa ilang pabor ngadto ni Mendoza.

“I believe ako gyud ang nidaog ato pero I think di pa gyud nako time,” matud ni Melindo. “Pero sa sunod kun makakuha ko og chance ako gyud i-sure nga makuha na ang world title."

Sa iyang bahin, si Villanueva  (27-1,14KOs) nagkanayon nga sakit kaayo ang iyang kasinatian   human siya mapakyas  pag-angkon sa IBF super flyweight title gikan ni McJoe Arroyo niadtong Hulyo didto sa Texas.

Sama sa sangka ni Melindo, naundang usab ang away ni Villanueva sa 10th round human siya nagisian sa kilay tungod sa headbutt, apan ang mga judges mihatag sa daog ngadto ni Arroyo.

Samtang si Fuentes (35-8, 20KOs) gusto usab mopakita nga aduna pa siya’y ikabuga human siya mapakyas pagsakmit sa WBC flyweight title dihang gi-TKO siya sa round six ni Nicaraguan boxing superstar Roman Gonzales niadtong Nobiyembre.

Mokompleto sa blockbuster card sa ALA Promotions ug ABS-CBN Sports, mao sila si former amateur standout Kevin Jake ‘KJ’ Cataraja, kinsa mohimo sa ikaduha niyang professional bout, samtang ang former world title challenger nga si AJ ‘Bazooka’ Banal mobalik  sab og saka sa ring. (BANAT NEWS)