SHS-ADC vs UC sa finals

CEBU, Philippines – Mga krusyal nga baskets ni Jason Florence

Abejo maoy nagtuboy sa University of Cebu Junior Webmasters ngadto sa 62-58 nga kadaogan batok sa University of the Visayas Baby Lancers sa ilang knockout match  kagabii aron moabante sa finals sa labing unang higayon sulod sa pito ka tuig ug maoy makigtakos sa Sacred Heart School-Ateneo de Cebu Magis Eagles sa best-of-three championship series sa juniors division sa nagpadayon nga 15th season sa Cebu Schools Athletic Foundation, Inc. (CESAFI) didto sa Cebu Coliseum.

Sa sayo pa, mikulit sa ilang ika-11 nga sagunson nga daog ang Magis Eagles human sila maka-ipsot batok sa University of san Carlos Baby Warriors, 57-54.

Nagtabla pa unta ang iskor sa 55-all may dos minutos ang nahibilin sa fourth period human sa basket ni Raul "Jancork" Cabahug apan human ma-ilog sa Junior Webmasters ang labaw, 57-55, si Abejo maoy mi-iskor sa kataposang singko puntos sa UC kinsa nabiyaan unta og otso puntos usa ka higayon, 21-29 sa basket gihapon ni Cabahug may 1:06 ang oras sa first quarter.

Sikit ang duwa gikan sa sinugdanan tungod kay natapos ang first period sa 11-all ug igo lang milabaw ang Baby Lancers og sayis puntos atol sa halftime, 31-25.

Nagtabla pag-usab ang iskor sa 46-all human sa third period ug nasakmit sa Junior Webmasters ang liderato human sa split charities ni Gelmart Umpad, ang labing gamitoy nga player sa UC kinsa dako kaayo'g gamit sa depensa.

Si Luigi Konrad Gabisan maoy nangu sa Junior Webmasters sa iyang 16 puntos, 13 ka rebounds ug usa ka block samtang si Froilan Mangubat, ang labing consistent nga scorer sa UC, midugang og 14 puntos uban sa iyang tulo ka rebounds ug lima ka steals.

Si Abejo miamot og 11 puntos uban sa iyang pito ka rebounds ug duha ka steals.

Naluya sa kadugayan si Cabahug tungod kay siya maoy gihan-okan sa opensa ug halos "predictable" na ang iyang lihok ug ma-depensaan og maayo sa UC.

Miburak og 34 puntos si Cabahug apan walay laing teammates ang misuporta kaniya ug nagsunod kaniya sa scoring mao si Ramesh Alforque kinsa igo lang nakahimo'g siete puntos.

Daghan sab og usik nga bola ang Baby Lancers kinsa gihamok sa daghang turnovers.

Sa laing bahin, mibahug og 10 puntos si Patrick Yu lakip ang duha ka three-pointers aron pangulohan ang Magis Eagles samtang wala sa'y player sa Baby Warriors nga nakahimo'g double figures.

Puntos matag usa:

UC (Jrs.) 62 – Gabisan 16, Mangubat 14, Abejo 11, Umpad 8, Labrada 5, Cuyos 4, Hemida 2, Ecal 2.

UV (Jrs.) 58 –  Cabahug 34, Ra. Alforque 7, Laurente 5, Oche 4, Yerro 4, Paraldo 3. Halftime: 25-31. (BANAT NEWS)