Magis Eagles sud na’s finals

CEBU, Philippines - Nakasud na sab sa finals ang defending champion Sacred Heart School-Ateneo de  Cebu Magis Eagles human nila mabihag ang University of Cebu Junior Webmasters , 79-47,  samtang ang University of the Visayas Baby Lancers mipalagpot  sa University of San Carlos Baby Warriors, 70-67 sa semifinals  sa juniors division sa 15th  Cebu Schools Athletic Foundation, Inc. (CESAFI) kagahapon didto sa Cebu Coliseum.

Gipangulohan ni Andrew Velasco ang Magis Eagles nga mikubit og 15 puntos, samtang si Jed Colonia mitusik og 13 puntos uban ang 11 ka rebounds, tulo ka assists ug tulo sab ka steals nga igo na kaayo alang kaniya aron ilhon isip best player of the game.

Agresibo kaayo ang Magis Eagles pagsugod diin miposte sila og 6-0  nga bentaha, apan nailog sa Junior Magis ang momentum, 12-10 sa labing unang higayon. Sa wala damha kalit lang misulbong ang Magis Eagles sa second period ug wala na molingi pa human moposte og 45-24 nga bentaha sa halftime.

Mirehistro sila sa labing daku nilang labaw nga 34 puntos, 79-45 sa basket ni Andre Benedict Chua sa nahabiling 1:02 sa duwa.

Ang Junior Webmasters  gipangulohan ni Greynal Malubay sa iyang 11 puntos ug upat ka rebounds.

Sa sayo pa, si Raul Jancork Cabahug mihimo na sab og double-double pinaagi sa iyang 25 puntos ug 16 ka rebounds alang sa Baby Lancers, kinsa magtagakay batok sa  Junior Webmasters karong alas-4 sa hapon alang sa katapusan luna sa finals.

Si Jim Paul Amistoso mihimo sab og career-high nga 13 puntos alang sa Baby Lancers.

Ang Baby Lancers maoy mikontrolar gikan sa pagsugod sa duwa, gani milansang sila og 14 puntos nga labaw, 59-45 sa katapusang 1:08 sa third quarter. 

Ang Baby Warriors gipangulohan ni Alje Mendez, kinsa miposa’g 17 puntos, samtang si Biedryn Aleyth Smith ug  Neon Aleikhem Chavez  nagkumboya’g 23 puntos. (BANAT NEWS)