Luna sa finals tuyo sa SHS-Ateneo, UC JRS.
CEBU, Philippines - Luna sa finals maoy ilogan karon sa wala’y pildeng defending champion Sacred Heart School-Ateneo de Cebu Magis Eagles ug University of Cebu Junior Webmasters sa krusyal nila nga duwa sa juniors division sa 15th Cebu Schools Athletic Foundation, Inc. (CESAFI) basketball event karong hapon diha sa Cebu Coliseum.
Ang duha parehong mihaw-as og daog batok sa tagsa-tagsa nilang kaatbang. Ang Magis Eagles nakadagit og daog batok sa University of the Visayas Baby Lancers, 69-45, samtang ang Junior Webmasters mipakurat sa University of San Carlos Baby Warriors, 76-66.
Seguradong ipakita sa Magis Eagles ug Junior Webmasters ang tanan nilang mahimo aron makaangkon og lingkoranan sa finals.
Ang duwa sugdan sa alas-2:30 sa hapon human sa engkuwentro tali sa Baby Lancers ug Baby Warriors nga magsangka sa ala-1 sa hapon.
Nagtangag og 9-0 nga baraha, ang Magis Eagles maoy inilog batok sa Junior Webmasters, kinsa ilang gilubong, 76-62 atol sa ilang duwa niadtong Agosto 30.
Kini kay lisud kaayong pugngan si Jed Colonia sa opensa. Ang Magis Eagles makalaum sab nilang Andrew Velasco, Errol Pastor ug Travis Jelor Mantua, ug uban pa.
Ang Junior Webmasters sa ilang bahin, magsandig sab nila ni Froilan Mangubat, Jason Abejo, Jelmark Umpad, Luigi Gabisan ug John Bryle Cuyos.
Sa mga sangka sa seniors division, buot sab sa Southwestern University Cobras nga mopahamtang og laing pilde ngadto sa UC Webmasters sa ilang duwa sa alas-4 sa hapon, samtang sa main game maglayog ang Cebu Institute of Technology-University Wildcats ug ang walay daog nga University of Southern Philippines-Foundation Panthers sa alas-5:30 sa hapon.
- Latest
